Երևանի ավագանու արտահերթ ընտրությունն ավելի ու ավելի հաճախ է սկսել դիտարկվել իբրև խորհրդարանական արտահերթ ընտրության հնարավոր մանրակերտ: Թե՛ մեկ, թե՛ մյուս ընտրությունը դեռևս չեն էլ վերածվել նախընտրական պաշտոնական գործընթացի, թեև կարծես թե անվիճելի է, որ դրանք տեղի են ունենալու: Երևանի քաղաքապետի արտահերթ ընտրությանը Նիկոլ Փաշինյանի «Քաղաքացիական պայմանագրի» հաղթանակը գրեթե չի հարուցում որևէ կասկած: Կասկած չի հարուցում այն, որ քաղաքապետարան կվերադառնա ԲՀԿ-ն՝ հաղթահարելով անցողիկ շեմը: Իսկ ահա շեմը հաղթահարելու ունակ երրորդ ուժի հանգամանքը բաց է, իսկ առանց երրորդ ուժի անցողիկ շեմը հաղթահարելու ընտրությունը չի համարվի կայացած:
Երևանի ավագանին պետք է ունենա առնվազն երեք խմբակցություն: Այստեղ, իհարկե, ինտրիգ է այն, թե արդյո՞ք մասնակիցները կլինեն երեքից ավելի: Ըստ ամենայնի հենց այդպես էլ կլինի, քանի որ ընտրությանը թեկուզ առանձին մասնակցելու մասին «Լուսավոր Հայաստանն» է հայտարարել, ՀԱԿ-ն է պատրաստվում վերադառնալ, Զարուհի Փոստանջյանը թերևս հեշտ չի զիջի դիրքերը, «Ժառանգությունն» է հայտարարում, որ մասնակցելու է: Այսպիսով, մեծ է հավանականությունը, որ Երևանի ավագանու արտահերթ ընտրությունը խորհրդարանի ընտրության նախավարժանքը կլինի, սակայն այն չի լինի Հայաստանում քաղաքական վերադասավորումների հանգրվան, ու դա բարեբախտաբար, որովհետև ի վերջո քաղաքական վերադասավորումներ պետք է լինեն խորհրդարանի ընտրությամբ: Թեմայի շուրջ «Առաջին լրատվական»- ի հետ քննարկմանը մասնակցեցին քաղաքագետներ Ստեփան Դանիելյանը, Ստեփան Գրիգորյանը և Ստեփան Սաֆարյանը:
Հնարավո՞ր է, որ հենց Երևանի քաղաքապետի ընտրությունը որոշի ԱԺ արտահերթ ընտրությունների ճակատագիրը. այս հարցին ի պատասխան՝ Ս. Գրիգորյանը նշեց. «Մեծ ազդեցություն կունենա, բայց չեմ կարծում թե բոլոր շեշտադրումները նույնը կլինեն, քանի որ նվազագույնը կես տարի կանցնի, և դա կլինի որոշիչ, քանի որ շատ բան կփոխվի, տրամադրությունները ևս կփոխվեն: Հեղափոխությունից հետո սպասելիքները մեծ են, հնարավոր է ինչ-որ սպաելիքներ չարդարանան և պատկերը մի փոքր այլ կլինի:
Ս. Գրիգորյանի խոսքով՝ մեզ մոտ չկա դասական բազմակուսակցական համակարգ, ամբողջը խարսխված է լիդերի դերի վրա. «Պատկերացնո՞ւմ եք ԲՀԿ-ն առանց Գ. Ծառուկյանի կամ «Ժառանգությունն» առանց Ր. Հովհաննիսյանի: Մեծ դեր է խաղում լիդերը ոչ թե ծրագիրը, հիմա լիդերը Նիկոլ Փաշինյանն է, նրա նկատմամբ վստահությունը շատ բարձր է, ակնհայտ է, որ նա ընտրություններին շատ ձայն կհավաքի»:
Ս. Սաֆարյանի դիտարկմամբ՝ «Ելք»-ը ճգնաժամ է ապրում. «Այդ ճգնաժամին ականատես եղանք և թավշյա հեղափոխությունից առաջ, երբ դաշինքը կազմող քաղաքական ուժերի առաջնորդներն ունեին տարբեր պատկերացումներ ճանապարհների վերաբերյալ, այդ ճանապարհները շատ չբաժանվեցին, բայց հեղափոխությունից հետո էլ չմիավորվեցին: Դա ներդաշինքային խնդիր է: Եթե չկա հայտարարություն միասին հանդես գալու մասին, ինքնին վկայում է այն մասին, որ Քաղաքացիական պայմանագիրը Երևանի քաղաքապետի ընտրություններին հանդես կգա առանձին: Երևանի ավագանու ընտրությունները ստուգատես են լինելու: Խորհրդարանական ընտրությունների վրա Երևանի քաղաքապետի ընտրությունները ազդեցություն կունենան, բայց դրանք նույնը չեն լինի»:
Ստեփան Դանիելյանի խոսքով՝ Հայաստանի քաղաքական ուժերը պատրաստ չեն ոչ մի բանի, կուսակցությունները կայացած են, չունեն հանրային վստահություն, այդ թվում նաև ՔՊ-ն: Նրա դիտարկմամբ՝ հանրային վստահություն ունի Ն. Փաշինյանը, և դեռևս ամեն ինչ նրա շուրջ է լինելու:
«Ելք»- ը նախորդ ժամանակաշրջանի ֆորմատ էր, հիմա իրողություն է փոխվել, ինչո՞ւ պետք է «Ելք» դաշինքը միասնական լինի»,- նշեց Ս. Դանիելյանը:
Մանրամասն՝ տեսանյութում: