Մեքսիկայի Սենատն ու Կոնգրեսը հավանություն են տվել երկրի ղեկավարության մեջ բանավեճեր առաջացրած օրինագծին, համաձայն որի՝ 75 տարում առաջին անգամ օտարերկրյա ներդրողները հասանելիություն կստանան երկրի ազգային նավթագազային ռեսուրսներին:
Համաձայն օրինագծի՝ մասնավոր նավթային և գազային ընկերություններին թույլատրվում է զբաղվել նավթի ու գազի արդյունաբերությամբ մեքսիկական պետական Pemex ընկերության հետ՝ շահույթի մասնաբաժնի դիմաց: Այս մասին փոխանցում է BBC-ն:
Երկրի նախագահ Էնրիկե Պենյա Նյետոյի խոսքով՝ մասնավոր ներդրումներն անհրաժեշտ են էներգետիկ ոլորտի արդիականացման և նավթի նվազող արտադրության խթանման համար:
Ընդդիմադիր քաղաքական գործիչները վճռականորեն դեմ են արտահայտվել օրենքի ընդունմանը: Նրանց կարծիքով՝ այն հակասում է երկրի ազգային շահերին:
