ԱլԳ-ն Բելառուսում ընկալվում է որպես աշխարհաքաղաքական հավասարակշռության տարր: Այսօր «Մետրոպոլ» հյուրանոցում մեկնարկած Հայաստանում Եվրոպական միության պատվիրակության և Արևելյան գործընկերության Քաղաքացիական հասարակության ֆորումի Հայաստանի ազգային պլատֆորմի կողմից կազմակերպված՝ «Եվրոպական ինտեգրացիա-2013. ԵՄ-Հայաստան հարաբերությունների հեռանկարները Արևելյան գործընկերության վիլնյուսյան գագաթնաժողովից հետո» թեմայով երկօրյա համաժողովի ընթացքում այս մասին ասաց Բելառուսի ազգային պլատֆորմի ղեկավար Վլադ Վիալիչկան:
Նա նշեց, որ Բելառուսը շատ հաճախ համարում են աութսայդեր, դիկտատուրա, բայց մարդկանց մասին խոսելիս պետք է ներկայացնել հասարակության ներսում ակնկալիքները: Նրա գնահատմամբ՝ հասարակությունը բաժանված երկու մասի՝ Մաքսային միության և ԵՄ-ի ԱլԳ ուղղության կողմնակիցներ:
«Մարդիկ տեղյակ են այս նախաձեռնության մասին, այն դրական է ընկալվում մարդկանց կողմից, բացասական չի համարվում, բայց այս ամենի նկատմամբ շատ դրական վերաբերմունք եղել է երկու տարի առաջ, երբ կառավարության հռետորիկան ավելի դրական էր մինչ ընտրությունները:
Եթե խոսենք ԱլԳ-ին վերաբերող մոտիվացիայի և կառավարության վարքի մասին, կարող եմ նշել մի քանի կետեր. առաջինը հետաքրքրությունն է՝ օգտագործել ԱլԳ-ն որպես աշխարհաքաղաքական հավասարակշռության տարր՝ պահպանելով ստատուս-քվոն, կառավարությունն օգտագործում է ԱլԳ-ն որպես գործիք, որպեսզի օգտագործի ՌԴ-ի հետ իր բանակցությունների ընթացքում, մյուսը վերաբերում է ներդրումներին:
Մենք գիտենք, որ կառավարությունները նույն կերպ են մտածում, բացասականն այն է, որ չկա երկխոսություն: Երբ խոսում ենք ԱլԳ-ի մասին՝ որպես ծրագրի, ապա պաշտոնական մոտեցումը հետևյալն է՝ ցանկանում են ենթակառուցվածքների համար կառուցել հավասար հարաբերություններ՝ ստանալու սեփական օգուտ:
Կա կարծիքների բազմազանություն, որը շատ կարևոր է»,- նշեց փորձագետը:
