Սևծովյան տնտեսական համագործակցության կազմակերպության հանձնաժողովի աշխատանքներին մասնակցելու նպատակով դեկտեմբերի 12-ին Հայաստան ժամանող Թուրքիայի արտգործնախարար Ահմեդ Դավութօղլուին «դիմավորելու» կգնան նաև ՀՅԴ «Նիկոլ Աղբալյան» ուսանողական և երիտասարդական միությունները: Վերջիններս նախաձեռնում են բողոքի ցույց՝ Թուրքիային և համաշխարհային հանրությանը հիշեցնելու, որ մենք պահանջում ենք ճանաչում և հատուցում:
Ուսանողական միության վարչության ատենապետ Գերասիմ Վարդանյանը «Առաջին լրատվական»-ի հետ զրույցում նշեց, որ իրենց ակցիային կարող են միանալ բոլոր ցանկացողները, սակայն միանալու հատուկ կոչ իրենք չեն արել:
«Մենք՝ որպես ՀՅԴ ուսանողական միություն, ցույց ենք անում՝ Թուրքիային և Դավութօղլուին հիշեցնելու, որ իրենք պարտք ունեն Հայաստանին և հայ ժողովրդին, Թուրքիայի իշխանություններին նորից հիշեցնելու, որ պետք է ճանաչել Հայոց ցեղասպանությունը, իսկ եթե իրենք չեն ճանաչում, ապա դրա հետևանքների ողջ պատասխանատվությունը թողնելու են իրենց հետագա սերունդների վրա»,- ասաց նա:
Վարդանյանը նշեց, որ ցույցի հետ կապված հստակ մանրամասներ այս պահի դրությամբ հաղորդել չի կարող՝ նրանք դեռ փորձում են հստակեցնել իրենց անցկացնելիք ակցիայի երթուղին: Բացի երթից՝ լինելու է ցույց, հնչելու են լոզունգներ, կոչեր, պարզվելու են պաստառներ, իսկ մնացածի առումով այս պահին դեռ հստակ ոչինչ որոշված չէ: Երթուղու հստակեցման համար, ատենապետի խոսքով, իրենք պիտի իմանան, թե Դավութօղլուի շարասյունն ինչպես է անցնելու, ինչ ճանապարհով:
ՀՅԴ երիտասարդ ակտիվիստները դեկտեմբերի 12-ին առավոտյան հավաքվելու են Հանրապետության հրապարակում, որից հետո երթով շարժվելու են Դավութօղլուին «ընդառաջ»:
