Ամերիկյան The Los Angeles Times օրաթերթը հոդված է հրապարակել «Ամուսնացնելով հայկական և մեքսիկական խոհանոցները» վերնագրով:
Հոդվածագիր Լորենցա Մունյոսը գրում է, որ իր մեքսիկական ընտանիքում ուտեստները միշտ կարևոր տեղ են զբաղեցրել և ընտանիքում քննարկումների ժամանակ եղել են հիմնական թեմաներից մեկը: «Բարեբախտաբար, այն մարդը, ում հետ ես ամուսնացա, բավարարեց իմ սննդի պահանջները և դեռ մի բան էլ ավելին: Ես ամուսնացա հայ ընտանիքում և շատ երջանիկ էի բացահայտելու, որ հայերն ու մեքսիկացիները հավանաբար նույն ցեղից են, սակայն բաժանվել են ծնվելիս: Մենք բարձրաձայն ենք խոսում, երաժշտություն ենք սիրում, ընտանիքասեր ենք, էմոցիոնալ (իմ հայրը մի անգամ ասաց, որ հայերի համեմատ մեքսիկացիներն ընդհանրապես շվեդ են): Եվ մենք սիրում ենք մեր խոհանոցները»,- գրում է հոդվածագիրը:
Հոդվածագիրը նշում է, որ ամոթ է զգացել, որ մինչ այդ չի ճանաչել հայկական մշակույթը, սակայն հետագայում շատ նմանություններ է գտել հայկական և մեքսիկական մշակույթներում:
Լորենցա Մունյոսը գրում է, որ իրենք հաճախ են հայ-մեքսիկական միջոցառումներ կազմակերպում` համեմատելու երկու խոհանոցները: Նա նշում է, որ իր հոր ընտանիքում են, օրինակ, անցկացնում ճրագալույցը Ծննդյան տոնից առաջ, որտեղ պատրաստվում է համեղ նախատոնական ընթրիք, իսկ տոներն արդեն իր ամուսնու ընտանիքում են անցնում:
