Տարեց ավստրալիացին, ով մի հրաշալի օր որոշել է ձուկ որսալ, նույնիսկ ենթադրել չէր կարող, թե ինչով դա կավարտվի: Գետն ընկած գարեջրի շշից արած միայն մեկ կումը նրա կյանքը սարսափի է վերածել:
Անցած տարվա մարտին 60-ամյա Ջոն Մաքդոնալդը Ավստրալիայի Բրիսբեն գետում ձկնորսություն անելիս պատահմամբ գարեջրի շիշը գետն է գցել, հետո առանց մտածելու բարձրացրել և շարունակել է խմել: Դրանից ընդամենը մի քանի ժամ անց տղամարդու ինքնազգացողությունը վատացել է: Այդ ժամանակվանից սկսած՝ Ջոնը չի կարողանում ազատվել այն մեծ նորագոյացությունից, որը սկսել է աճել նրա որովայնի մեջ:
Մաքդոնալդը երեք վիրահատություններ է տարել, սակայն դրանք ոչ միայն չեն օգնել, այլև վիճակն ավելի են բարդացրել, հաղորդում է Mail Online-ը:
Այդ ամենից հետո տղամարդը ստիպված է եղել դիմել համաշխարհային հանրությանը՝ խնդրելով բուժել իրեն այդ խորհրդավոր հիվանդությունից: Սակայն ավստրալիացուն ոչինչ չի օգնում:
«Ակնհայտ է, որ Բրիսբեն գետն ավելի աղտոտված է, քան մարդիկ են կարծում: Այժմ հասկանում եմ, որ գետն ընկած շշից խմելը հիմարություն էր: Ես ստիպված եմ այս հիվանդությունով մինչև կյանքիս վերջն ապրել»,- հայտարարել է նա:
