Ուկրաինայի «Բատկիվշչինա» խմբակցության առաջնորդ Արսենի Յացենյուկը հայտարարել է, որ իշխանությունները մտադիր են երկրում արտակարգ դրություն հայտարարել:
«Մենք տեղյակ ենք, որ այժմ Վիկտոր Յանուկովիչի աշխատակազմը մշակում է արտակարգ դրություն հայտարարելու հարցը»,- ասել է Յացենյուկը Կիևի Ազգային դիմադրության շտաբում:
Նա նշել է նաև, որ Ուկրաինայի Անվտանգության ծառայությունը քրեական գործ է հարուցել իշխանություն զավթելու փաստով, «որը ոչ ոք չի զավթել, քանի որ իշխանությունը Ուկրաինայում ժողովրդին է պատկանում»:
«Մենք պաշտոնապես դիմում ենք նախագահ Վիկտոր Յանուկովիչին. արտակարգ դրություն մտցնելու փորձերը ոչ այլ ինչ են, քան պետական հեղաշրջում Վիկտոր Յանուկովիչի կողմից»,- նշել է Յացենյուկը:
Խմբակցության առաջնորդը կոչ է արել մարդկանց նույնիսկ արտակարգ իրավիճակ հայտարարելու դեպքում դուրս գալ բողոքի ակցիաների, հաղորդում է Интерфакс-ը:
Դրա հետ մեկտեղ, քաղաքական գործիչը հերթական անգամ նշել է, որ ակցիան խաղաղ է, և ցուցարարները վարչական ոչ մի շենք չեն զավթել:
«Եթե նրանք կարծում են, որ արտակարգ դրություն հայտարարելով կճնշեն իրավիճակը, մեր պատասխանը հետևյալն է. այն միայն կսրի իրավիճակը: Եվ ցանկացած արյունահեղության մեղքը կընկնի անձամբ Վիկտոր Յանուկովիչի վրա»,-հայտարարել է Յացենյուկը:
