Թուրքական Sabah թերթի փոխանցմամբ՝ Թուրքիայի վարչապետ Ռեջեփ Թայյիփ Էրդողանը կրկին հիասթափեցրել է Ադրբեջանին։ Չնայած բոլոր սպասումներին՝ նա հունիսի 12-ին տեղի ունեցած խորհրդարանական ընտրություններից հետո իր առաջին արտասահմանյան այցը կատարելու է ոչ թե Ադրբեջան, այլ՝ Եգիպտոս։
Դրանով Էրդողանը ցանկանում է ուղերձ հղել արաբական աշխարհին և այդ կերպ ցույց տալ, որ Թուրքիան աջակցում է այդ երկրներում հեղափոխական ու ժողովրդավարական փոփոխություններին։
Չի բացառվում, որ Էրդողանը հազարավոր մարդկանց առջև ելույթ ունենա Կահիրեի «Թահրիր» հրապարակում։ Եգիպտական այցից հետո Էրդողանը կայցելի Ադրբեջան և Հյուսիսային Կիպրոս։
Հիշեցնենք, որ ավելի վաղ նշվում էր, թե Էրդողանը խորհրդարանական ընտրություններից հետո առաջինն այցելելու է կա՛մ Ադրբեջան, կա՛մ Հյուսիսային Կիպրոս, որոնց հետ են առնչվում «մեկ ազգ, երկու պետություն» կամ «մեկ ազգ, երեք պետություն» սկզբունքները։
Չպետք է մոռանալ, որ Ադրբեջանը հրաժարվեց հունիսի 8-ին մասնակցել Թուրքիայի Կայսերի քաղաքում տեղի ունեցած Nabucco գազատարի համաձայնագրի ստորագրմանը։
