Թուրքական Hürriyet Daily News and Economic Review թերթին տված հարցազրույցի ժամանակ Tower Turizm գործակալության սեփականատեր Տիգրան Ալթունը հայտարարել է, որ թուրքական երկու տուրիստական գործակալություններ համատեղ պլանավորել են օգոստոսին հատուկ ճամփորդություններ կազմակերպել դեպի Հայաստան, թեև 1993 թվականից հայ-թուրքական սահմանը փակ է.
«Tower Turizm և Tüten Turizm զբոսաշրջային գործակալությունները մտադիր են կանոնավոր ուղևորություններ կազմակերպել երկու երկրների միջև։
Երկու ժողովուրդների միջև ճանաչողության բացակայությունը բացասականորեն է ազդում երկու երկրներ կատարած ճամփորդությունների վրա։ Մարդիկ հարցնում են՝ արդյո՞ք դա անվտանգ է։ Դժբախտաբար, մարդիկ չեն ճանաչում միմյանց, ինչի համար էլ տատանումներ են ունենում։ Արդեն 15 զբոսաշրջիկ գրանցվել է մեզ մոտ՝ Հայաստան մեկնելու համար։
Ես ավելի մեծ հույսեր չունեի էլ։ Մարդկանց հետաքրքրությունը գնալով կաճի։ Նախորդ դեպքերում ցանկացողների թիվն ավելի քիչ է եղել։ Պոլսահայերից բացի, Թուրքիայից Հայաստան են այցելել նաև փոքրաթիվ թուրք զբոսաշրջիկներ։
Տարիներ շարունակ թուրք զբոսաշրջիկները Հայաստան են ժամանել Վրաստանի տարածքով, սակայն այժմ իրավիճակը փոխվել է. զբոսաշրջիկներն օդանավով Թուրքիայից կթռչեն Երևան։ Այդ զբոսաշրջային փաթեթն արժենալու է 960-1200 եվրո։
Իմ մեծագույն ցանկությունն է երկու երկրների միջև հարաբերությունների կարգավորումն ու երկխոսության հաստատումը»։
