Կոնդի խաբված բնակիչներն այսօր հավաքվել էին կառավարության շենքի մոտ՝ պահանջելու իրենց բնակարանները:
Կոնդի բնակիչների կողմից լիազորված Իռա Նազինյանն «Առաջին լրատվական»-ի հետ զրույցում նշեց, որ 2007-ից դուրս են եկել տներից և մինչ օրս անօթևան են:
Մի քանի օր առաջ Կոնդի բնակիչները հանդիպել են Սերժ Սարգսյանին, նա վերստին խոստացել է խնդրին լուծում տալ:
ՀՀ կառավարության աշխատակազմի ղեկավար-նախարար Վաչե Գաբրիելյանին մեքենա նստելիս մոտեցավ Իռա Նազինյանը և հետաքրքրվեց երկու տարի առաջ ստեղծված միջգերատեսչական հանձնաժողովի ճակատագրով, որի նախագահը Վաչե Գաբրիելյանն է: «Ես ուզում էի իմանալ՝ ի պաշտոնե դեռ ի՞նքն է, թե նախարարը քանի որ փոխվել է, ինքը չէ, ասաց, որ առայժմ ինքն է պատասխանատու, որ կասի՝ մեզ կընդունեն»,- ասաց Իռա Նազինյանը:
Նա սրտնեղած նշեց, որ երկու ամիս է՝ արդարադատության նախարարը չի ընդունում իրենց. «Զանգեցի Արդարադատության նախարարություն՝ իմանամ Արդարադատության նախարարությունը ՀՀ քաղաքացու, թե Մարոկոյի քաղաքացու համար է աշխատում»:
Կոնդի նախկին բնակչուհի Անահիտ Ղազարյանն էլ նշեց, որ 215 ընտանիք փողոցում է հայտնվել. «Թղթի կտոր են տվել, որով երեք բնակարան պետք է ստանամ, բայց դա էլ չեն տալիս, արդեն վեց տարի անչափահաս երեխաների հետ դրսում ենք, և դեռ չգիտենք՝ այդ տունը կտեսնենք, թե ոչ»,- ասաց նա:
