2013 թվականի վերջին 11 ամիսներից 4-ում ՀՀ սպառողական շուկայում արձանագրվել է գների նվազում, մայիս ամսին գներն անփոփոխ են մնացել, իսկ 6 ամիսներին գնաճ է արձանագրվել, որը նախորդ տարվա համեմատ կազմել է 4,5 տոկոս: Ընդ որում` պարենամթերքի գներն ճել են 1.4 տոկոսով, իսկ ոչ պարենային ապրանքներինը՝ 3.5 տոկոսով: Ծառայությունների սակագներն աճել են 9,9 տոկոսով: Այս մասին այսօր լրագրողների հետ հանդիպման ժամանակ ասաց ԱՎԾ գների վիճակագրության և միջազգային համադրումների բաժնի պետ Գուրգեն Մարտիրոսյանը:
Նրա խոսքով` այս ամիսների ընթացքում ամենաբարձր գնաճն արձանագրվել է բանջարեղեն և կարտոֆիլ ապրանքային խմբում: Գնաճ արձանագրվել է նաև ձկնամթերքի շուկայում՝ 3,3 տոկոսով, կաթնամթերքի գծով՝ 0,4 տոկոս, ձվի գներն աճել են 0.1 տոկոսով, աճել են նաև ոգելից խմիչքի և ծխախոտի գները՝ կրկին 0.1 տոկոսով:
Գնանկում է արձանագրվել հացամթերքի, կենդանական և բուսական յուղի գծով՝ 0.1 տոկոս, 1.5 տոկոսով նվազել է շաքարավազի գինը:
Անփոփոխ է մնացել միայն մսամթերքի ընդհանուր գինը, ինչպես նաև ոչ ոգելից խմիչքի գինը:
Վերջին մեկ ամսում հանրապետության 11 բնակավայրերից բոլորում 0.5-1.2 տոկոս գնաճ է արձանագրվել: Իսկ ամենաբարձր գնաճը Կապան քաղաքում է եղել՝ 1.2 տոկոս: Այդ ժամանակահատվածում Երևանում արձանագրվել է 0.8 տոկոս գնաճ:
Զուգահեռներ անցկացնելով Եվրամիության 27 երկրների հետ` Գուրգեն Մարտիրոսյանն ասաց, որ այդ երկրներից 15-ում հոկտեմբեր ամսին գնանկում է արձանագրվել, 4 երկրում գներն անփոփոխ են մնացել, իսկ 8 երկրում կրկին գնաճ է արձանագրվել: «Գների փոփոխությունը եվրամիության երկրներում գնանկման միտում է ունեցել 0.1 տոկոսով»,- ասաց Մարտիրոսյանը:
Ինչ վերաբերում է ԱՊՀ երկրներին, ապա ամենաբարձր գնաճն արձանագրվել է Բելառուսում՝ 12 տոկոս, ապա ՌԴ-ում՝ 5.5 տոկոս: Հարևան երկրներից Վրաստանում գնաճը կազմել է 0.5 տոկոս, Թուրքիայում՝ 7 տոկոս, Ադրբեջանում՝ 0.5 տոկոս:
Գուրգեն Մարտիրոսյանը Հայաստանում վերջին ամիսներին արձանագրված գնաճը պայմանավորեց հիմնականում սեզոնային գործոնով:
