Թուրքիայում լույս տեսնող հայկական «Ժամանակ» օրաթերթի խմբագիր Սևան Տեյիրմենճյանը «Առաջին լրատվականի» հետ զրույցում նշեց, որ խորհրդարանական ընտրություններում ձայների նման հարաբերակցությունը սպասելի էր։
Սևան Տեյիրմենճյանը սպասելի էր համարում թե՛ Էրդողանի իշխող «Արդարություն և զարգացում» կուսակցության ստացած մոտ 50% ձայները, թե՛ «Ժողովրդահանրապետական» և «Ազգայնական շարժում» կուսակցության դիրքերի բարելավումը։
Ինչ վերաբերում է մեծ թվով քուրդ պատգամավորների մուտքին Թուրքիայի խորհրդարան՝ «Ժամանակ»-ի խմբագիրը պարզաբանեց.
«Թուրքական մամուլը մատնանշում է, որ ընտրություններում հաղթել է ոչ միայն Էրդողանը, այլ նաև քուրդ պատգամավորները»,- քանի որ, ինչպես նշեց Սևան Տեյիրմենճյանը, նախկինում այսքան քուրդ պատգամավոր ներկայացված չի եղել թուրքական խորհրդարանում։
Մեր զրուցակիցը վստահ է՝ առաջին լուրջ փոփոխությունը, որ տեղի կունենա առաջիկայում Թուրքիայի ներքաղաքական կյանքում, Էրդողանի կողմից սահմանադրական փոփոխություններ իրականացնելու առաջարկը կլինի խորհրդարան, իսկ արտաքին քաղաքականության մեջ փոփոխությունների մասին խոսելը Սևան Տեյիրմենճյանը դեռ վաղ է համարում, հատկապես, որ «Թուրքիայում նախընտրական շրջանում օրակարգում ընդհանրապես չեն լինում արտաքին քաղաքականության հարցեր»։
Միևնույն ժամանակ, «Ժամանակ»-ի խմբագիրը հետաքրքրական է համարում Էրդողանի՝ ընտրություններից հետո առաջին հայտարարությունը, որտեղ նա նշում է, թե սա ոչ միայն իր հաղթանակն է՝ Ստամբուլինն ու Անկարայինը, այլ նաև՝ Բեյրույթի, Դամասկոսի հաղթանակը։
«Սա ցույց է տալիս, որ Թուրքիայի՝ տարածաշրջանում գերտերություն լինելու հավակնությունն էլ ավելի կամրանա»,- նկատում է Սևան Տեյիրմենճյանը։
