Միջազգային ճգնաժամային խումբը, անդրադառնալով հայաստանյան իրադարձություններին, դիտարկել է Ղարաբաղի գործոնը՝ հնարավոր համարելով, որ Հայաստանի անկայունությունը կարող է նպաստել լարվածության աճին Լեռնային Ղարաբաղի հակամարտության գոտում: Փորձագիտական առաջին վարկածն այն է, որ ստեղծված իրավիճակում ԼՂՀ հրամանատարները կարող են կանխարգելիչ հարված հասցնել 2016-ի պատերազմի տարածքային կորուստները վերականգնելու նպատակով: Ընդ որում, հեղինակի կարծիքով՝ դա կարող է լինել թե՛ ռազմական ղեկավարության որոշման հետևանք, թե՛ Երևանի էլիտայի քաղաքական ռազմավարության մի մասը: Այս վարկածը, մեղմ ասած, հեռու է իրականությունից և ամրապնդված չէ որևէ կոնկրետ փաստով:
Չնայած Հայաստանում առկա քաղաքական ճգնաժամին՝ մեր երկրում իրավիճակը դուրս չի եկել վերահսկողությունից, ճիշտ հակառակը՝ հասարակության աննախադեպ համախմբվածությունը փակուղին հաղթահարելու նախադրյալներ է ստեղծում: Մյուս կողմից՝ չնայած քաղաքական հակամարտությանը, Հայաստանում լիակատար կոնսենսուս կա Ղարաբաղյան խնդրի, այն բանակցությունների ճանապարհով լուծելու հարցում, մյուս կողմից՝ հայկական զինված ուժերն ու ԼՂՀ իշխանություններն ամբողջովին վերահսկում են իրավիճակը: Հեղինակը առաջ է քաշում նաև երկրորդ վարկածը, ըստ որի՝ Բաքուն կօգտվի Հայաստանում ստեղծված ներքաղաքական ճգնաժամից և կսանձազերծի պատերազմ: Ադրբեջանում, իհարկե, կան նման տրամադրություններ, անգամ իշխող կուսակցության պատգամավորների մակարդակում, սակայն Բաքվի էլիտան, կարծես թե, հագուրդ չի տալիս այդ տրամադրություններին: Ալիևի իշխանությունը մի կողմից՝ շփոթված է Հայաստանում տիրող իրավիճակից, մյուս կողմից՝ հակված է սպասել հայաստանյան իրադարձությունների զարգացմանը:
Բաքվում հրաշալի հասկանում են, որ թավշյա հեղափոխությունը թեև քաղաքական ճգնաժամ է հարուցել Հայաստանում, սակայն միջազգային հանրության աչքերում ավելի է բարձրացրել Հայաստանի հեղինակությունը, ինչը նվազեցնում է պատերազմի ռիսկերը: Միջազգայինփորձագետներն առաջ են քաշում նաև երրորդ վարկածը, ըստ որի՝ իրավիճակը կարող է դուրս վերահսկողությունից: Ավելորդ է ասել, որ Ճգնաժամային Խումբը, ըստ էության, ճանաչում է Նիկոլ Փաշինյանի իշխանության լեգիտիմությունը:
Ավելի կարևոր է այն հանգամանքը, որ հեղինակավոր կենտրոնի՝ պատերազմի հետ կապված մտահոգությունները հիմնականում փարատված են, որովհետև Հայաստանում ներքաղաքական ճգնաժամը մոտ է հանգուցալուծման: Իհարկե, դա ամբողջովին չի վերացնում պատերազմի վերսկսման ռիսկերը, սակայն ճգնաժամից Հայաստանը դուրս է գալիս անհամեմատ ուժեղացած, ինչը խաղաղության ամենակարևոր երաշխիքն է: Այս և այլ տարածաշրջանային հարցերի շուրջ «Առաջին լրատվական»-ը հյուրընկալել են քաղաքագետ Անուշ Սեդրակյանն ու միջազգայնագետ Հովհաննես Իգիթյանը: