Հայաստանում անտառային տարածքներն անապատացումից փրկելու, կլիմայական փոփոխությունների նկատմամբ դրանց կայունությունը բարձրացնելու նպատակով Բնության համաշխարհային հիմնադրամի և ԵՄ-ի կողմից իրականացվող պիլոտային ծրագրի շրջանակներում Լոռու և Տավուշի մարզերումիրականացվել են 150 հա անտառտնկման աշխատանքներ: Այսօր լրագրողների հետ հանդիպման ժամանակ այս մասին հայտարարեց Հայաստանում ԵՄ պատվիրակության ներկայացուցիչ Ջոն Բարքերը՝ հավելելով, որ անտառների տրանսֆորմացիայի ծրագիրը մեկնարկել է 2012 թվականի աշնանը և կավարտվի 2014-ին:
Հանդիպման մյուս բանախոս՝ Բնության համաշխարհային հիմնադրամի ներկայացուցիչ Մաթիաս Լիխտենբերգերն իր հերթին նկատեց, որ իրենք կովկասյան տարածաշրջանին բնապահպանական ծրագրերի շրջանակներում աջակցում են արդեն 20, իսկ Հայաստանում աշխատում են 10 տարի:
«Հիմնադրամն ամբողջ աշխարհում առանձնացրել է 35 թեժ կետ, որոնցից մեկը իր կենսաբազմազանությամբ հայտնի կովկասյան տարածաշրջանն է: Հարավային Կովկասում իրականացվող ծրագրի հիմնական ռազմավարությունն անտառտնտեսությունների պահպանումն է: Մեր նպատակն է անտառներն առավել կայուն դարձնել կլիմայի փոփոխությունների հանդեպ»,- ասաց նա:
«Անտառների տրանսֆորմացիայի միջոցով էկոհամակարգերի կայունության բարձրացում կլիմայի փոփոխության նկատմամբ» ծրագրի հայաստանյան համակարգող Սիրանուշ Գալստյանն էլ նշեց, որ հայաստանյան ծրագիրը արժեցել է 430 հազար եվրո: Աշխատանքի կարևորագույն մասը կազմել է անտառածածկ տարածքների ցանկապատումը՝ դրանք արածեցումներից զերծ պահելու համար:
«Անտառտնկման աշխատանքների ժամանակ օգտագործվել են միայն տեղում աճող, կլիմայական այդ պայմաններին սովոր ծառերի սերմերը: Ծրագիրը գյուղական համայնքների բնակիչներին ապահովել է աշխատատեղերով»,- նշեց նա:
ՀՀ գյուղատնտեսության նախարարության «Հայանտառ» ՊՈԱԿ-ի գլխավոր անտառապետ Ռուբեն Պետրոսյանը ներկաներին տեղեկացրեց, որ հանրապետությունում՝ բացառությամբ Արմավիրի և Արարատի մարզերի, ինչպես նաև Երևանի, մոտ 17 հազար հա արհեստական սոճուտներ ունենք:
«Անտառների տրանսֆորմացիայի արդյունքում միատարր անտառները վերածվում են բազմատարր անտառների: Մաքուր սոճուտները վատ են դիմակայում հրդեհներին, երաշտներին ու հիվանդություններին: Իսկ տրանսֆորմացիայի ենթարկված տարածքներն ավելի դիմացկուն են»,- ասաց նա:
