Վարդան Մինասյանի Հայաստանի ազգային հավաքականի գլխավոր մարզչի պաշտոնում վերադառնալը լայն քննարման առարկա է դարձել հասարակության շրջանում: Տարիներ շարունակ երկրպագուները սպասում էին այս մասնագետի վերադարձին: Շատերի կարծիքով Մինասյանն այն մարզիչն է, որը կարող է ոտքի կանգնեցնել Հայաստանի հավաքականը: Վերջինս նախապատրաստվում է Ազգերի լիգայի խաղարկությանը և իրական հնարավորություն ունի հայտնվելու 2020 թվականին կայանալիք Եվրոպայի առաջնության եզրափակիչ փուլում: Մինասյանի վերադարձի, ինչպես Հայաստանի հավաքականին վերաբերվող խնդիրների մասին «Առաջին լրատվականը»-ը զրուցել է մեր ազգային թիմի նախկին կիսապաշտպան շվեդական «Լինշոպինգ սիթիում» ելույթ ունեցող Լևոն Պաչաջյանի հետ: Վերջինս Հայաստանի հավաքականում խաղացել է նաև Մինասյանի գլխավորությամբ:
-Լևոն, երկար տարիներ լինելով մեր հավաքականի առաջար ֆուտբոլիստներից մեկը, ինչպե՞ս կգնահատեք Վարդան Մինասյանի վերադարձը:
-Եթե նայենք այն թեկնածուներին ովքեր որ կարող էին այս պահին գլխավորել հավաքականը, ապա կարծում եմ Մինասյանի ընտրությունը տրամաբանական էր։ Խոսքը նրա մասին է, որ ֆեդերացիան բազմիցս նշել է, որ վստահելու է տեղացի հայ մարզչի։ Կարծում եմ հաշվի են առել անցյալի հաջողությունները և Մինասյանի երիտասարդ ֆուտբոլիստների հետ լավ աշխատելու փորձը։
-Ստեղծված իրավիճակում կկարողանա՞ այս մասնագետը ոտքի կանգնեցնել մեր հավաքականը:
-Ժամանակը ցույց կտա, համենայնդեպս պետք է լավատես լինել։ Չնայած իրոք մեծ խնդիրներ են առաջացել վերջին ժամանակահատվածում։ Հավաքականը ոչ միայն հաղթանակների կարիք ունի, այլ պետք է ձեռագիր ունենա, որը պետք է հիմք դառնա կայուն ելույթների։ Թե ինչքանով կկարողանա Մինասյանը իր ձեռքի տակ ունեցող կադրերով դրան հասնել ցույց կտա ժամանակը։
-Իսկ որո՞նք են խորը ճգնաժամի պատճառները
-Պատճառները բազմաթիվ են։ Չկա կոնկրետ մեկը, որը վերացնելով կկարողանան ամեն ինչ շտկել։ Կադրերի ճիշտ ընտրություն, տակտիկա, թիմի կարգը, ընդանուր ֆուտբոլի զարգացվածությունը Հայաստանում և այլն…: Բայց այն պայմաններում որում հայտնվել է Հավաքականը կարծում եմ իրատեսական է գոնե Ազգերի Լիգայում հաղթողի կոչմանը հավակնել։
-Ֆեյսբուքյան էջում երեկ գրառում էիք արել ազգային հավաքական Ձեր վերադառնալու վերաբերյալ: Որքանո՞վ է դա իրատեսական
-Եթե ակեղծ, ապա դա իհարկե կատակ էր։ Ուղղակի հղում էի արել, որ մի քանի տարի առաջ Հավաքականում աշխատած մասնագետը հետ է վերադարձել և հնարավոր է հիշեն առաջվա սերունդների մասին…: Բայց եթե լուրջ ենք խոսում իրոք չեմ կարծում, որ նման բան տեղի կունենա։
-Շատ ֆուտբոլասերներ կարծում են, որ Մինասյանի հետ հավաքական կվերադառնա նաև Յուրա Մովսիսյանը և էլի մի քանի ֆուտբոլիստներ, որոնք հայտնի պատճառներով չէին հրավիրվում: Ի՞նչ եք կարծում Յուրա Մովսիսյանը, Գևորգ Կասպարովը, Լևոն Պաչաջյանը այսօր կարո՞ղ են օգտակար լինել մեր հավաքականին:
-Նորից եթե նայենք այն հայտարարություններին, որոնք տեղ են գտել անցյալում ապա չեմ կարծում, որ նման բան տեղի կունենա։ Իսկ ձեր նշած ֆուտբոլիստները միշտ էլ աշխատել են հավաքականին օգուտ տալ և կարծում եմ նման հնարավորության դեպքում իրենց կարգի, փորձի և վարպետության շնորհիվ անպայման օգտակար կարող են լինել։ Բայց իրականությունը այլ է։
-Որպես փորձառու ֆուտբոլիստ, ի՞նչ փոփոխություններ են հարկավոր հավաքականում ճգնաժամը հաղթահարելու համար:
-Կարծում եմ Հավաքականը հոգեբանորեն ընկճված է և հավատի պակաս կա։ Պետք է ֆուտբոլիստներին համոզել, որ ոչինչ անհնար չէ և պետք է ավելի համարձակ գործել։ Բոլորն էլ կարողանում են փոխանցում և կասեցում անել, բոլորն էլ տակտիկա գիտեն բայց վերջին խաղերում ընկճվածություն կա։ Եվ իհարկե պետք է աշխատել ձեռագրի վրա, որ առաջին երկու-երեք փոխանցումից հետո հասկանալի լինի, որ թիմը հստակ դրված ձեռագիր ունի։
-Անդրադառնանք Ձեր թիմին ու մրցելույթներին Շվեդիայի առաջնությունում: Ինպե՞ս եք սկսել մրցաշրջանը:
-Անցած շաբաթ առաջին խաղը անցկացրեցինք, որը շատ բարդ ստացվեց։ 1:1 հաշվով ավարտվեցը խաղը և պետք է ասեմ կարող էինք և հաղթել, և պարտվել։ Բայց եթե հաշվի առնենք, որ մենք կորուստներ ունեինք և ոչ բոլորն էին 100% պատրաստ ու դրա հետ մեկտեղ խաղում էինք այս դիվիզիոնի ամենափորձառու և կայուն թիմերից մեկի դեմ ապա՝ հաշիվը և խաղը բավարար կարող եմ գնահատել։
Շվեդիա է տեղափոխվել նաև Յուրա Մովսիսյանը, սակայն նրա նորամուտը ուշանում է: Տեղյա՞կ ես որն է պատճառը:
Ճիշտն ասած դեռ կապի մեջ չեմ և կոնկրետ տեղյակ չեմ ինչն է խնդիրը բայց իմ փորձից ելնելով կարող եմ ենթադրել, որ պատճառը աշխատանքային վիզան է։ Շվեդիայում, երբ նոր ես ստանում աշխատանքային վիզա, սովորաբար 1-2 ամիս տևում է այդ պրոցեսը։
