Գերմանիայի կանցլեր Ֆրիդրիխ Մերցի հետ համատեղ մամուլի ասուլիսին «Դոյչե վելլե»-ի թղթակիցը Ադրբեջանի նախագահ Իլհամ Ալիևին հարցրել է մի քանի օր առաջ Բաքվում Գերմանիայի և Ռուսաստանի ներկայացուցիչների միջև «գաղտնի բանակցություններից» նրա իրազեկվածության մասին։
Ալիևը պատասխանել է, որ հուլիսի 12-ին Ադրբեջանի պետական սահմանապահ ծառայությունը արձանագրել է երկու գերմանացի և երկու ռուսաստանցի նախկին պաշտոնատար անձի Բաքու ժամանումը։ Նրա ներկայացմամբ, գերմանական կողմից Ադրբեջանի մայրաքաղաք են ժամանել Բրանդենբուրգ երկրամասի նախկին վարչապետ Մաթիաս Պլատցեկը և դաշնային կանցլերի աշխատակազմի գործերի նախկին կառավարիչ Ռոնալդ Պոֆալը, իսկ Ռուսաստանից՝ նախկին վարչապետ Վիկտոր Զուբկովը և նախագահին առընթեր Մարդու իրավունքների խորհրդի նախագահ Վալերի Ֆադեևը։
Ալիեւը պարզաբանել է, որ նրանց միջեւ տեղի ունեցած հանդիպման մասին ինքը տեղեկություն չունի։ «Մեր տարածքը օգտագործել են առանց մեզ տեղեկացնելու»,- ասել է Ալիևը և հավելել, որ եթե այդ հանդիպումը «կարող է նպաստել Ռուսաստանի և Ուկրաինայի միջև պատերազմի ավարտին, ապա կարելի է միայն դա ողջունել»։
Բաքվում ռուս-գերմանական հանդիպման մասին «անտեղյակություն» է հայտնել նաև Գերմանիայի կանցլեր Մերցը։ Նա, ընդսմին, հրապարակայնացրել է, որ նման շփումները «չեն փոխում կառավարության դիրքորոշումը, Գերմանիան Ուկրաինային կաջակցի այնքան ժամանակ, քանի դեռ Ռուսաստանի նախագահը դիրքորոշումը չի փոխի»։
«Գաղտնի բանակցությունների» թեմայի հրապարակայնացումը վկայում է, որ եթե անգամ նման հանդիպում կազմակերպվել է, ապա կողմերը որևէ համաձայնության չեն եկել։ Միջազգային պրակտիկայում լուրջ խնդիրների մասին ընդունված չէ «թեթևամտորեն» խոսել։
Ավելի կարևոր է, որ գերմանացի եւ ռուսաստանցի նախկին պաշտոնյաների Բաքու այցի հաջորդ օրը Իլհամ Ալիևը օկուպացված Շուշիից ուկրաինացիներին կոչ է արել «երբեք չհաշտվել օկուպացիայի հետ», ինչից հետևում է, որ նա ռուս-գերմանական «գաղտնի» բանակցությունների հարթակ տրամադրելու մտադրություն չունի։
