ԱՄՆ պետքարտուղար Մարկո Ռուբիոն հայտարարել է, որ Միացյալ Նահանգները դեռևս պատրաստ է բանակցել իրանական ճգնաժամին վերջ դնելու շուրջ, սակայն Թեհրանը լրջորեն չի մոտենում բանակցություններին, քանի որ ընդլայնվող հակամարտությունը խաթարել է աշխարհի էներգետիկ երկու ամենակարևոր նեղուցների (անցումների) աշխատանքը:
Ռուբիոն այս մեկնաբանություններն արել է Հարավարևելյան Ասիայի արտաքին գործերի նախարարների հանդիպման ժամանակ՝ այն բանից մեկ օր անց, երբ Սաուդյան Արաբիայի հում նավթը Ասիա տեղափոխող երեք նավթային տանկերներ Կարմիր ծովում փոխեցին իրենց ընթացքը՝ ակնհայտորեն ի պատասխան Եմենի՝ Իրանի հետ կապված հութիների կողմից հնչեցված սպառնալիքների:
Ռուբիոն հայտարարել է, որ Վաշինգտոնը «միշտ հավատարիմ է դիվանագիտությանը», սակայն կասկած է հայտնել, թե արդյոք Թեհրանը նույնքան պատրաստակամ է բանակցությունների հարցում։
«Խնդիրն այն է, որ այս պահին նրանք լրջորեն չեն մոտենում բանակցություններին: Եթե նրանք լուրջ լինեն, մենք էլ լուրջ կլինենք: Եթե ոչ, ապա մենք կանենք այն ամենը, ինչ անհրաժեշտ է մեր և մեր դաշնակիցների շահերը պաշտպանելու համար»,- ասել է Ռուբիոն։
Նա ընդգծել է, որ չի կարելի թույլ տալ Իրանին վերահսկել Հորմուզի նեղուցը՝ պնդելով, որ դա վտանգավոր նախադեպ կստեղծի ողջ աշխարհի, այդ թվում՝ Հարավարևելյան Ասիայի երկրների համար, որոնցից շատերը Հարավչինական ծովում տարածքային վեճեր ունեն Չինաստանի հետ։
«Եթե Մերձավոր Արևելքում ստեղծենք մի նախադեպ, որտեղ ազգային պետությունը կարող է որոշել, որ պատրաստվում է վերահսկել միջազգային ջրային ուղին, տուրք գանձել, իսկ չվճարելու դեպքում՝ պայթեցնել ձեր նավերը, ապա մենք կստեղծենք շատ վտանգավոր նախադեպ, որը կկրկնվի աշխարհի այլ մասերում, այդ թվում՝ այս տարածաշրջանում»,- ասել է Ռուբիոն։
