Դավիթ Շահնազարյանը կմիանա Հայաստանի՝ ՄՄ անդամակցության դեմ քաղաքացիական դիմադրությանը: Այսօր լրագրողների հետ հանդիպմանը այս մասին ասաց ինքը՝ «Համաձայնություն» կենտրոնի ղեկավար Դավիթ Շահնազարյանը, անդրադառնալով Հայաստանում ստեղծված իրավիճակից ելքերին և քաղբանտարկյալների հարցին:
Նա նկատեց, որ Հայաստանում էապես սկսել է աճել քաղբանտարկյալների թիվը: Դավիթ Շահնազարյանը մասնավորապես խոսեց Վարդան Պետրոսյանի, Շանթ Հարությունյանի և նրա ընկերների, ապա նաև ազատամարտիկ Վոլոդյա Ավետիսյանի մասին: Նրա համոզմամբ՝ նրանք բոլորը քաղաքական հետապնդման են ենթարկվում: Քաղաքական գործչի կարծիքով՝ կարելի էր խափանման միջոց կալանքը փոխարինել հանրապետությունը չլքելու ստորագրությամբ:
Ինչ վերաբերում է Հայաստանում ստեղծված իրավիճակից ելքերին, ապա նրա խոսքով՝ պետք է իրավական ճանապարհով խոչընդոտել, որպեսզի սեպտեմբերի 3-ի գործարքը ձևակերպվի իրավաբանորեն: Սակայն նա հստակեցրեց, որ ՀՀ Սահմանադրությունը դա թույլ չի տալիս, և եթե ներկայիս խորհրդարանը քվեարկի ՄՄ-ի անդամակցության օգտին, ապա իրավական ճանապարհով դա կբողոքարկվի մինչև ՄԻ եվրոպական դատարան, և այդ դեպքում իրավաբանորեն ՀՀ-ն կհամարվի ՌԴ-ի կողմից օկուպացված երկիր:
«Ավելացնեմ՝ սա ուղղված է ՌԴ ղեկավարությանը, իսկ օկուպանտների դեմ պայքարում են բոլոր միջոցներով՝ ոչ միայն քաղաքական: Երկրորդ ելքն այն է, որ միայն քաղաքացիական հասարակությունը կարող է անել: Պետք է ձևավորվի քաղաքացիական դիմադրություն, որի միակ նպատակը կլինի պաշտպանել ՀՀ անկախությունն ու ինքնիշխանությունը:
Այսօր ուկրաինական ժողովրդի մասին ասում են, որ հպարտ ժողովուրդ է, մեր մասին դա չեն ասում, որովհետև ժողովրդի հպարտությունը չափում են ՌԴ-ին ծառայող ուժերի հպարտությամբ, բայց մեր հասարակությունը դա ապացուցելու է: Մենք կարողանալու ենք պահպանել մեր ինքնիշխանությունը»,- ասաց նա:
Շահնազարյանը հավելեց, որ պատրաստ է միանալ բոլոր պայքարներին, որոնք ուղղված կլինեն ՀՀ ինքնիշխանության ու պետականության պահպանմանը: Նա ողջունեց նաև Պարույր Հայրիկյանի նախաձեռնությունը՝ «Վիլնյուս կամ հրաժարական»՝ համարելով, իհարկե, որ նախաձեռնությունը կարող էր այլ խորագիր ունենալ՝ «Ասոցացման համաձայնագրի ստորագրում կամ պաշտոնանկություն»:
