Ֆինանսների նախարարությունը ներկայացրել է այս տարվա առաջին 9 ամիսների բյուջեի կատարողականը, որով եկամուտները նորից առաջ են անցել ծախսերից: Այսպես, պետբյուջեի եկամուտները մոտ 785 մլրդ 600 հազար դրամ էին, իսկ ծախսերը` 709 մլրդ 800 մլն դրամ: Այնպես որ, պետբյուջեն կատարվել է նորից հավելուրդով:
Նախ եկամուտները ծախսերից առաջ են անցել կատարողականով: Եթե եկամուտների կատարողականը 100.1% էր, ապա ծախսերինը` 91.6%: Երկրորդը աճի տեմպն է, որով եկամուտները նորից առաջ են անցել: 2012 թվականի ինն ամիսների համեմատ պետական բյուջեի եկամուտների աճի տեմպն արագացել է` հասնելով 17.9%-ի, իսկ ծախսերն աճել են 7.5 տոկոսով:
Ինչպես միշտ, հարկային եկամուտների մեջ ամենամեծ բաժինն ունի ավելացված արժեքի հարկը, որն անուղղակիորեն վճարում է սպառողը: Ի դեպ այս հարկի մեծ տեսակարար կշիռը հարկային եկամուտներում վկայում է նրա մասին, որ մեր երկրում սպառումը հարկելն ավելի հեշտ է, քան այսպես ասած, արտադրությունը հարկելը: Պարզ ասած, սա ստվերի մեծության մասին խոսող ցուցանիշներից մեկն է: Հարկային եկամուտների աճը նույնպես մեծ մասամբ պայմանավորված է ավելացված արժեքի հարկի աճով:
Իհարկե հարկային եկամուտների աճի վրա ազդել է նաև 2013 թվականից հարկային օրենսդրության մեջ կատարված փոփոխությունը, որով նախկին եկամտահարկի և պարտադիր սոցիալական ապահովության վճարների փոխարեն ներդրվել է մեկ միասնական` եկամտային հարկ:
