Հայաստանում տեղակայված ռուսական ռազմակայանը տեղաբաշխված է տարբեր ռազմական ավաններում, որոնց ցանկը անհրաժեշտության դեպքում ենթակա է փոփոխման, «Ազատություն» ռադիոկայանի հետ զրույցում պարզաբանելով ռուսական ռազմակայանի համար տարածքներ հատկացնելու կառավարության երեկվա որոշումը՝ ասել է պաշտպանության նախարարի առաջին տեղակալ Դավիթ Տոնոյանը:
Ըստ փոխնախարարի, ռուսական կողմին հավելյալ տարածքներ տրամադրելու վերջին որոշումը բխում է նաև Հայաստանի անվտանգության խնդիրներից: Նույն նկատառումներով էլ ըստ փոխնախարարի, ռուսական ռազմակայանը համալրվում է 18 ուղղաթիռներով:
«ՀՀ անվտանգության ապահովման ուղղությամբ ռազմակայանի խնդիրների փոփոխության պատճառով 102-րդ բազայի ռազմաօդային բաղադրիչը ուժեղացվում է մեկ ուղղաթիռային էսկադրիլիայով»,- ասել է Տոնոյանը։
Փոխնախարարը հստակեցնում է, որ Էրեբունի օդանավակայանում տեղակայված ռուսական ավիաբազայի արդիականացման և նոր սպառազինությամբ համալրման նպատակով տրամադրվող տարածքները հայկական զինուժի կողմից չեն օգտագործվում և դրանք տրամադրվում են ժամանակավոր օգտագործման համար:
«Ժամանակավոր նշանակում է՝ այն ժամանակաշրջանը, որով երկարաձգված է ռուսական բազայի տեղակայումը Ռուսաստանում»,- հստակեցրել է փոխնախարարը։
Հիշեցնենք, որ 2011 թվականի ապրիլին Ազգային ժողովը վավերացրեց Հայաստանում ռուսական ռազմաբազայի տեղակայման ժամկետը 49 տարով երկրարացնելու որոշումը:
Հարցին, թե ի՞նչ պայմաններով են տրվում տարածքները և արդյոք ռուսական կողմը վարձահատո՞ւյց է լինում դրանց համար, Դավիթ Տոնոյանը պատասխանել է.- «ՌԴ-ն վարձահատույց չէ Հայաստանին ֆինանսական առումով, բայց մեր պայմանավորվածությունները մեր անվտանգության ապահովման առումով երևի թե ֆինանսականից ավելի բարձր են»։
Մանրամասները՝ «Ազատություն» ռադիոկայանի կայքէջում
