«ՄԱԿ-ի բնակչության հիմնադրամը իրականացրել է բնակչության թվաքանակի կանխատեսում, և ըստ այդ կանխատեսման՝ մինչև 2050 թվականը ՀՀ-ում 65 տարեկան և ավելի տարիքի բնակչության թվաքանակը կհասնի գրեթե 22 տոկոսի, որը շատ մտահոգիչ թիվ է»,- «Առաջին լրատվական»-ի հետ զրույցում ասաց ՄԱԿ-ի Բնակչության հիմնադրամի «Օժանդակություն բնակչության հարցերով քաղաքականությունների իրականացմանը» ծրագրի համակարգող Աննա Հովհաննիսյանը։ Նրա խոսքով՝ այս ֆոնին նվազում է նաև ծնելիության թիվը, այդ տենդենցը պահպանվելու է նաև առաջիկա տարիներին։
Աննա Հովհաննիսյանի խոսքով՝ ծնելիության նվազման տենդենցը նկատվում է դեռևս 1990-ական թվականներից։ Պատկերը փոխելու համար, մեր զրուցակցի խոսքով, կառավարության հետ համատեղ բազմաթիվ քայլեր են ձեռնարկում, մշակում են ռազմավարություն, ազգային ծրագիր, որը ներառելու է կոնկրետ քայլեր։
Մեր դիտարկմանը, թե այս ֆոնին նախադրյալներ կա՞ն 2040 թվականին Հայաստանի բնակչությունը հասցնելու 4 միլիոնի, տիկին Հովհաննիսյանը նկատեց. «Այո, ժողովրդագրական պատկերը շատ մտահոգիչ է, արտագաղթի տեմպը՝ նույնպես, բնակչության ծերացումը նույնպես խնդիր է, բայց մենք այս բոլոր հարցերի շուրջ ինտենսիվ աշխատում ենք կառավարության հետ։ 4 միլիոն բնակչություն ունենալը շատ լավ ուղենիշ է։ Կոնկրետ նպատակ կա, որի ուղղությամբ աշխատում ենք։ Մենք օգտագործում ենք 4 միլիոնը որպես հստակ ուղենիշ»,- ասաց Հովհաննիսյանը։
Առավել մանրամասն՝ տեսանյութում:
