Թուրքական Milliyet թերթի փոխանցմամբ՝ բրիտանական The Economist պարբերականն անդրադարձ է կատարել կիրակի օրը Թուրքիայում կայացած խորհրդարանական ընտրություններին։
Ի դեպ, բրիտանական պարբերականը ընտրություններից 10 օր առաջ նույն թեմայով հոդված էր հրապարակել, որում թուրք ընտրազանգվածին կոչ էր արել իրենց քվեն տալ գլխավոր ընդդիմադիր ուժ Ժողովրդա-հանրապետական կուսակցությանը (ԺՀԿ), որով և հարուցել էր Էրդողանի զայրույթը։
Պարբերականի թղթակից Ամբերին Զամանն այդ մասին իր հոդվածը վերնագրել է հետևյալ կերպ. «Էրդողանը հեթ-տրիկ արեց»։
Հոդվածագիրն ուշադրություն էր հրավիրում այն բանի վրա, որ խարիզմատիկ առաջնորդ ունեցող «Արդարություն և զարգացում» կուսակցությունը (ԱԶԿ) երրորդ անգամ անընդմեջ հաղթում է խորհրդարանական ընտրություններում։ Ավելին, ամեն անգամ նա բարելավում է իր ցուցանիշները՝ ստանալով ավելի շատ վստահության քվե։
Հիշեցնենք, որ «հեթ-տրիկ» արտահայտությունն ընդունված է ֆուտբոլում, և այդպես են անվանում մեկ խաղի ընթացքում երեք գոլի հեղինակ դարձած ֆուտբոլիստին։
Ինչ վերաբերում է Էրդողանի կուսակցության հեթ-տրիկին, ապա դա հիրավի ռեկորդ է։ Ճիշտ է՝ 1946 թվականին բազմակուսակցական համակարգի ներդրումից հետո Դեմոկրատական կուսակցությունը (ԴԿ) նույնպես կարողացել է 3 անգամ անընդմեջ (1950, 1954, 1957) հաղթանակ տանել խորհրդարանական ընտրություններում, սակայն նա չի կարողացել ամեն անգամ կայուն աճ արձանագրել։
1950 թվականի մայիսի 14-ի ընտրություններում ԴԿ-ն ստացավ քվեների 52.7 տոկոսը (408 մանդատ), իսկ 1954 թվականի մայիսի 2-ի ընտրություններում՝ քվեների 57.5 տոկոսը (502 մանդատ)։ Թեև 1957 թվականի հոկտեմբերի 27-ի ընտրություններում «ԴԿ»-ն երրորդ անգամ անընդմեջ հաղթեց (հեթ-տրիկ արեց) խորհրդարանական ընտրություններում, սակայն նա չկարողացավ պահպանել այդ աճի տեմպը՝ ստանալով քվեների 47.9 տոկոսը (424 մանդատ)։
ԱԶԿ-ի ցուցանիշներն են՝ 03.11.2002 – 34.28 տոկոս և 363 մանդատ, 22.07.2007 – 46.58 տոկոս և 341 մանդատ, 12.06.2011 – 49.90 տոկոս և 326 մանդատ։