Լիբանանի խորհրդարանի հատուկ հանձնաժողովը խոշոր համաշխարհային տերությունների ներկայացուցչներին կխնդրի երկրին տրամադրել սարքավորումներ՝ Իսրայելի կողմից լրտեսվելուց պաշտպանվելու համար: Այս մասին հայտնում է Naharnet գործակալությունը:
ՄԱԿ-ի Անվտանգության խորհրդի մշտական անդամ բոլոր երկրների դեսպաններն ու Լիբանանում ԵՄ հատուկ ներկայացուցիչը նոյեմբերի 26-ին հրավիրվել են խորհրդարան: Պատգամավորները մտադիր են խնդրել դիվանագետներին Բեյրութին սարքավորումներ տրամադրել իսրայելական լրտեսումից պաշտպանվելու համար:
Գործակալությունը նշում է, որ Իսրայելի ներկայացուցիչները սահմանին սարքավորումներ են տեղադրել, որոնք ուղղված են Լիբանանի հարավում լրտեսում իրականացնելուն: Լիբանանցի խորհրդարանականների կարծիքով՝ իսրայելական սարքավորումները կարող են ազդել Լիբանանում ՄԱԿ-ի խաղաղապահների աշխատանքի վրա:
Իսրայելի «հետախուզական» գործողությունների հակազդման աշխատանքների արժեքը լիբանանցի խորհրդարանականները գնահատել են 20 մլն դոլար:
Լիբանանի խորհրդարանի՝ կապի հարցերով հանձնաժողովը նոյեմբերի սկզբին հատուկ հայտարարությամբ դատապարտել էր երկու երկրների սահմանին իսրայելական լրտեսման կայանների տեղադրումը:Ամենախոշոր կայանները տեղակայված են Ալ-Աբադ և Յան Ալ-Ալամ բնակավայրերում:
