«ՀՀԿ-ն պետք է նշանակի վարչապետ և նա այդ իրավունքը ստացել է խորհրդարանական ընտրությունների արդյունքում։ Դա ընդդիմության թուլության, մարգինալության հետևանք է, ՀՀԿ-ի ներսի կոնսենսուսի արդյունք է։ Այսինքն՝ շատ մեծ թվով մարդիկ կան, որոնց ձեռնտու է, որ Սարգսյանը լինի վարչապետ։ Եթե ամբողջ ՀՀԿ-ն իր առաջնորդի դեմ լիներ՝ դա կամ տեղի չէր ունենա, կամ շատ մեծ դժվարությամբ տեղի կունենար»- «Առաջին լրատվական»-ի հետ զրույցում նման տեսակետ հայտնեց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը։
Նրա կարծիքով՝ ընդդիմությունն այսօր ի վիճակի չի լինի կանխել Սարգսյանի հնարավոր վարչապետությունը։ «Պետք է հավաքել կես միլիոն մարդ, և նրանք պետք է կանգնեն ոչ թե մեկ ժամ, այլ գուցե ամիսներով։ Գիտե՞ն անհրաժեշտ տեխնոլոգիաները, իսկ ի՞նչ կլինի, եթե այդ հանրահավաքներն արգելվեն, ի՞նչ կլինի հանրահավաքի 17-րդ կամ 23-րդ օրը, իսկ երկրո՞րդ օրը։ Այդ ամենը կոնկրետ քաղաքական քայլեր են, ես չգիտեմ՝ դա ով կարող է անել»,- նկատեց Իսկանդարյանը։
Շարունակելով իր միտքը, քաղաքագետն ընդգծում է. «Եթե իմանայի, որ իրենք արդեն ԵԱՏՄ-ից դուրս են եկել, փողոցներն անվանափոխել են ու դա տեղի է ունեցել, որովհետև հազարավոր մարդիկ փողոց են դուրս եկել… բայց այդ ամենը տեղի չի ունեցել, ինչո՞ւ պետք է մտածեմ, որ հիմա դա հնարավոր է։ Ի՞նչ է փոխվել։ Մենք տեսնում ենք, որ ընդդիմության քաղաքականությունն ավելի ու ավելի է շոուի վերածվում, ուստի շոու կլինի՝ ես դա ձեզ խոստանում եմ։ Անմիջապես ընտրություններից հետո, այդ պատճառով՝ անպայման կլինի, բայց ռեալ նշանակություն չի կարող ունենալ նշանակման հարցում, կներեք, խոսքը երկրի ղեկավարի նշանակման մասին է։ Ընդդիմությունն այսօր այդ ռեսուրսը չունի, ու պատկերացնել, որ կունենա ապագա ամիսներին՝ չեմ կարող»։
Հարցազրույցն ամբողջությամբ՝ տեսանյութում։
