«Այն հանդիպումները, որոնք մի քանի օր առաջ Դավոսում ունեցավ Կարեն Կարապետյանը, դրանք ըստ իս` տնտեսական հարաբերություններ կերտելու հանդիպումներ չէին, այլ ավելի շատ քաղաքական հանդիպումներ էին, Հայաստանը ճանաչելի դարձնելու հանդիպումներ էին, իսկ տնտեսական գծով հանդիպումներ այնտեղ ավելի շատ ունեցավ Տրանսպորտի, կապի և տեղեկատվական տեխնոլոգիաների նախարարը, որոնք շատ կարևոր էին և հույս ունեմ, որ այդ հանդիպումներն իրենց պտուղները պիտի տան։ Այս պահի դրությամբ` դրանք միայն հույսեր են և լավ կլիներ, որ առաջիկայում այդ ամենը կոնկրետ արդյունք ունենար», – «Առաջին լրատվական»-ի հետ զրույցում նշեց Հայաստան–Շվեյցարիա խորհրդարանական պատգամավորական խմբի գլխավոր քարտուղար Սարգիս Շահինյանը ` անդրադառնալով վարչապետի Դավոս կատարած այցին։
Վերջինս նաև հավելեց. «27 տարի է արդեն, որ Հայաստանն անկախ պետություն է և շատ հաճախ ինքս ինձ հարց եմ տալիս, թե ինչու ստիպված եղանք 27 տարի սպասել ` այս տեսակ երկկողմանի հարաբերություններ կերտելու համար, այսինքն, այդ այդ ամբողջ պոտենցիալը, որը մենք այսօր ունենք ` ունեինք նաև 26-27 տարի առաջ, բայց հարց է ծագում` ինչու այդ ամբողջ աշխատանքը, որն ի սկզբանե պետք է տարվեր ` չտարվեց»։
Մեր զրուցակցի հավաստմամբ` Հայաստանն ու Շվեյցարիարիան այսօր կարող են համագործակցել տարբեր ոլորտներում. զբոսաշրջության, տեղեկատվական տեխնոլոգիաների, վերականգնվող էներգետիկայի, տրանսպորտի և բազմաթիվ այլ ուղղություններով աշխատելու հնարավորություն կա։
Նա վստահ է, որ զարգացման մեծ ներուժ ունեցող այս ոլորտները պետք է արտահանել և հավուր պատշաճի ներկայացնել արտասահմանում, սակայն նրա դիտարկմամբ` դա պետք է անել պատրաստված և բանիմաց կադրերի միջոցով, ովքեր ի վիճակի կլինեն իրենց արտադրանքի որակը ճիշտ ձևով մատուցել և տարածել արտաքին շուկաներում։ Այս համատեքստում պարոն Շահինյանը նկատեց նաև, որ սա երկարատև աշխատանք ու ջանք պահանջող գործընթաց է և սխալ կլինի կարծելը, թե կարճ ժամանակահատվածում այդ զարգացումը կարող է տեղի ունենալ։
«Օրինակ տրանսպորտի խնդիրը. ինչ- որ մեկը կարո՞ղ է բացատրել արդյոք, թե ինչու առ այսօր օդային ուղիղ կապ չկա Հայաստանի և Շվեյցարիայի միջև և արդյոք այս խնդիրն ըստ արժանվույն ուսումնասիրվել է և համապատասխան դասեր քաղվել են», – հարց է բարձրացրեց նա։
Մանրամասները ` տեսանյութում։