Մեծ Բրիտանիայի արտգործնախարար Ուլյամ Հեյգը հույս ունի, որ Սիրիայի հարցով «Ժնև 2» խաղաղ համաժողովը կհաջողվի անցկացնել մինչ այս տարվա ավարտը: Այս մասին նախարարը հայտարարել է բրիտանական խորհրդարանում՝ փոխանցում է ITAR-TASS-ը:
«Այդ համաժողովը պետք է կազմակերպվի հնարավորինս արագ,- կարծում է Հեյգը,- Մենք հույս ունենք, որ այն կանցկացվի մինչ այս տարեվերջ և կօգնի Սիրիայում անցումային քաղաքական գործընթաց սկսել»:
Նա ողջունել է Սիրիայի ընդդիմադիր և հեղափոխական ուժերի որոշումը համաժողովի մասնակցության վերաբերյալ: Ազգային կոալիցիայի հայտարարությունում նշվում է, որ Ասադի ռեժիմը և դրա հետ կապված անձինք անցումային շրջանում և Սիրիայի ապագայում դերակատարում ունենալու հնարավորություն չունեն: Կոալիցիան հայտարարել է նաև մինչ համաժողովը երկրի պաշարված շրջաններին մարդասիրական օգնություն ապահովելու անհրաժեշտության մասին:
Կոալիցիան անհրաժեշտ է համարում նաև բանտարկյալների ազատ արձակումը, հատկապես կանանց ու երեխաների: Ընդդիմությունը համոզված է, որ Սիրիայում քաղաքական լուծման հասնելու համար Ասադի ռեժիմը պետք է կատարի միջազգային հանրության, ՄԱԿ-ի ու ԱՊԼ-ի բանաձևերը:
Նոյեմբերի 25-ինՍիրիայի հարցով ՄԱԿ-ի և ԱՊԼ-ի հատուկ ներկայացուցիչ Լախդար Բրահիմին պատրաստվում է Ժնևում ԱՄՆ-ի ու Ռուսաստանի հետ եռակողմ խորհրդակցությունների հերթական ռաունդն անցկացնել՝ գնահատելու համաժողովի նախապատրաստման վիճակը:
