Բելառուսցի ռազմական վերլուծաբան Ալեքսեյ Ալեսինը հայտարարել է, թե Բելառուսը չի վաճառել Ադրբեջանին «Պոլոնեզ» համազարկային կրակի ռեակտիվ համակարգեր (ՀԿՌՀ) այն պատճառով, որ ՀԱՊԿ-ում Բելառուսի գործընկեր Հայաստանն է դրան դեմ եղել: Այս նույն փորձագետն էր ամիսներ առաջ մեկ այլ բելառուսական լրատվամիջոցի հետ զրույցում կարծիք հայտնել, թե Բելառուսը կարող է «Պոլոնեզ» մատակարարել Ադրբեջանին, և հնարավոր է, որ բելառուսական կողմը նման առաջարկ արած լինի հոկտեմբերի 9-ին Մինսկում Բելառուսի նախագահ Լուկաշենկոյի և Ադրբեջանի պաշտպանության նախարար Հասանովի հանդիպման ընթացքում:
Նախկինում, իհարկե, մանրամասն գրել ենք «Պոլոնեզի» հնարավորությունների և դրա շուրջ քննարկումների մասին: Այս համակարգերը, ըստ փորձագետների, կարող են խոցել թիրախները մոտ 200 կմ հեռավորության վրա, այդ պատճառով դրանք ներկայացվում էին որպես Հայաստանին Ռուսաստանի կողմից մատակարարված, շատ ավելի հզոր «Իսկանդեր» օպերատիվ-տակտիկական հրթիռային համալիրներին ռազմաքաղաքական հակակշիռ ստեղծելու միջոց, այլ խոսքերով՝ «Իսկանդերի հակաթույն»: Հետագա ամիսներին այս լուրերը չհաստատվեցին: Եվ հիմա գլխավոր հարցն այն է, թե որքանո՞վ է բելառուսցի փորձագետի այս վարկածը համապատասխանում իրականությանը: Կա՞ արդյոք ինչ-որ ֆորմալ կամ ոչ ֆորմալ մեխանիզմ, որի միջոցով ՀԱՊԿ անդամ պետությունը կարող է ազդել գործընկեր պետության ռազմական գործարքների վրա: Գուցե սա պարզապես քաղաքական ժե՞ստ է Մինսկի կողմից, կամ գուցե կան գործարքի ենթադրյալ ձախողման ա՞յլ պատճառներ:
«Առաջին լրատվական»-ի այս հարցին Մոսկվայի Նորագույն պետությունների ինստիտուտի տնօրեն, քաղաքագետ Ալեքսեյ Մարտինովը պատասխանեց, թե վստահ չէ, որ կա նման մեխանիզմ, բայց եթե նման հայտարարություն է արվում, ապա այն ակնհայտորեն անհիմն չէ:
Փորձագետն այս համատեքստում խոսեց նաև Ռուսաստանի կողմից Հայաստանին և Ադրբեջանին զենք մատակարարելու մասին՝ կարծիք հայտնելով, թե դա «ռազմական պարիտետի պահպանման ձև է»:
Մոսկվայի Քաղաքական և ռազմական վերլուծությունների կենտրոնի փոխտնօրեն, ռազմական փորձագետ Ալեքսանդր Խրամչիխինը ծանոթ չի նման մեխանիզմների, որոնք թույլ կտան կանխել զենքի վաճառքը ՀԱՊԿ անդամ պետության կողմից մեկ այլ երկրի:
«Անկեղծ ասած՝ ես ոչինչ չեմ լսել նման մեխանիզմների մասին, որ ինչ-որ մեկը ՀԱՊԿ-ի ներսում կարող է ինչ-որ բան արգելել մեկ ուրիշի: Մինչ օրս Բելառուսը շատ մեծ քանակի զենք է վաճառել հենց Ադրբեջանին, իսկ Հայաստանին՝ ոչինչ: Կարծում եմ, որ պարզապես «Պոլոնեզը» դեռևս Բելառուսում էլ լիարժեքորեն չի ընդունվել զինված ուժերի կիրառմանը, այդ պատճառով դժվար թե Բելառուսն այս պահին կարողանա վաճառել ինչ-որ մեկի: Բացի այդ, «Պոլոնեզն» իրականում արտադրվել է չինական տեխնոլոգիաների հիման վրա, և հնարավոր է, որ Բելառուսն ինչ-որ խնդիրներ ունի նաև Չինաստանի հետ: Ես չեմ բացառում, որ Չինաստանը որոշակի չափով կարող է վերահսկել այդ համակարգի վաճառքը երկրից դուրս», – «Առաջին լրատվական»-ի հետ զրույցում մեկնաբանեց Ալեքսանդր Խրամչիխինը: