Վարդան Պետրոսյանի մասնակցությամբ ողբերգական ավտովթարից հետո երկու օր առաջ դերասանի հանդեպ խափանման միջոց կիրառվեց կալանքը: Մի խումբ արվեստագետներ այս որոշումից հետո հավաքվել և նամակ են ուղարկել ՀՀ Գլխավոր դատախազ Գևորգ Կոստանյանին և ՀՀ Կոտայքի մարզի դատախազ Վարդան Ռշտունուն՝ խափանման միջոցը փոխելու համար:
Արվեստագետները նամակում երաշխավորում են, որ Վարդան Պետրոսյանը չի խուսափի դատաքննությունից և չի խոչընդոտի քննությանը:
Այսօր լրագրողների հետ հանդիպմանը նրանցից մի քանիսը հաստատեցին, որ խափանման միջոցը կալանքն օգտագործելը օրենքի խախտում է: Նրանց համոզմամբ՝ օրենքի մեջ չկա բարոյականություն:
Արվեստաբան, ԳԱԱ թղթակից անդամ Հենրիկ Հովհաննիսյանը նշեց, որ բոլոր դեպքերում պատասխանատվությունից խուսափել չի կարելի, պատասխանատվության չափ կա, որքան էլ դա լինի ակամա, սակայն նման կերպ վարվելն անմարդկային է. «Ես այստեղ տեսնում եմ բարբարոս, վայրենի, գիշատիչ վերաբերմունք մարդու հանդեպ: Խնդիրը բնազդական ատելությունն է հոգևորի նկատմամբ: Մեր տեսակը ընդունված տեսակ չէ այս աշխարհում»:
Նրա հավաստմամբ՝ այս երկրում կա՛մ չի գործում անմեղության կանխավարկածը, կա՛մ տեղ-տեղ է աշխատում:
Դերասան Միքայել Պողոսյանը ևս համոզված է՝ խափանման միջոցը կալանքը ընտրելն անմարդկային է, և նրանք պատրաստ են կանգնել ոչ միայն Վարդան Պետրոսյանի, այլև բոլոր նրանց կողքին, ովքեր դառնում են կամայականությունների զոհ:
Թատերագետ Արա Խզմալյանն էլ հավելեց, որ մեր երկրում չկա հանդուրժողականություն, իսկ այս դեպքից հետո այնպես է թվում, ասես երկրի ամենավտանգավոր հանցագործը Վարդան Պետրոսյանն է, մինչդեռ մարդիկ կարող են օրերով սպառնալիքներ հնչեցնել, և երկրում անվտանգություն ասես չլինի:
Ասուլիսին ներկա Տիկնիկային թատրոնի տնօրեն, արվեստագետ Ռուբեն Բաբայանն էլ հավելեց, որ Վարդանը ազատ մարդ է, պատասխանատու մարդ է, և չի կարելի նրան ընկալել որպես թշնամի. «Մենք այստեղ չենք հավաքվել, որ կոչ անենք՝ նրան ազատել պատասխանատվությունից, մենք ուզում ենք, որ խափանման միջոցը փոխվի, և նա ապաքինվի: Այստեղ ամենաքիչը պետք է քննիչը փոխվի, եթե ոչ, մենք կկարծենք, որ դա ողջ քննչական դաշտի մոտեցումն է»:
