Այսօր ԱԺ պետաիրավական հարցերի հանձնաժողովում քննարկվեց Գեղամյան-Փաշինյան միջադեպի հարցով ԱԺ էթիկայի հանձնաժողով ստեղծելու մասին «Ելքի» նախագիծը:
«Ելք» խմբակցության պատգամավոր Էդմոն Մարուքյանն իր ելույթում ասաց. «թե Կոստանյանն ասում է, որ այս հարցը պետք է տանենք քրեաիրավական դաշտ, մենք այդ համատեքստում չենք հարցը քննարկում, գոյություն ունի ԱԺ կանոնակարգ օրենք, դեպքը տեղի է ունեցել խորհրդարանական Հայաստանի խորհրդարանում: Իբր թե խորհրդարանական կառավարման գնացող երկրի խորհրդարանում տեղի է ունեցել պատգամավորի նկատմամբ հարձակում՝ նրա կողմից ԱԺ ամբիոնից կարծիքներ արտահայտելու համար: Եթե մենք չենք պատժում, որևէ ընթացակարգ չենք սկսում, որևէ պատգամավոր չի կարող բացառել, որ այստեղ իր վրա կհարձակվեն բռունցքներով կամ մարմնի այլ մասերով: Այս հանձնաժողովը կարող է այս հարցին ճիշտ լուծում տալ: Գեղամյանը չի բողոքում, որովհետև հարձակվողն ինքն է, եթե Փաշինյանը ֆեյսբուքի իր 57 հազարանոց էջում զրպարտել է, Գեղամյանը չի հերքել ու չի բողոքել, որ իրեն զրպարտել են, այսինքն, ըստ էության չհերքված փաստի մասին ենք խոսում: Կա փաստ, դա անողն էլ չի հերքել, ուղղակի այլ կերպ է ներկայացրել, թե վիճաբանություն է եղել, անախորժություն: Հետևաբար պետք է ստեղծենք հանձնաժողով, որ գնահատական տանք և կանխենք բռնությունները այս շենքում: Եթե դա չենք կարող անել, ապա ումից ինչ ենք պահանջում: Հետո էդ ո՞նց է լինում, որ միշտ ընդդիմադիրների վրա են հարձակվում, որովհետև միշտ եղել է անպատժելիություն»:
