Կենտրոն և Նորք-Մարաշ վարչական շրջանների ընդհանուր իրավասության դատարանում Գագիկ Պողոսյանի նախագահությամբ սկսվեց և ավարտվեց Խաչատուր Ղալեչյանի գործի դատավարությունը:
Ըստ մեղադրանքի՝ 2013 թվականի հուլիսի 4-ին, ժամը 22-ն անց 50 րոպեին Խաչատուր Ղալեչյանը ուրիշի գույքը վնասելու դիտավորությամբ աշխատանքային ժամից հետո հանրավտանգ եղանակով իր հետ բերած դյուրավառ հեղուկով լի բանկայով հարվածել է ՀՀ գլխավոր դատախազության վարչական շենքի երկրորդ մուտքի փայտե քառափեղկ դռանը և դրա վրա տեղադրված ճաղավանդակին:
Ապակե բանկան կոտրվել է: Թափված դյուրավառ հեղուկը հրկիզելու միջոցով Ղալեչյանն այրել է գլխավոր դատախազության երկրորդ մուտքի դռան մի հատվածը՝ գլխավոր դատախազությանը պատճառելով 37 հազար 550 դրամի նյութական վնաս:
Խաչատուր Ղալեչյանը կալանքի տակ է առնվել: Նրան մեղադրանք է առաջադրվել ՀՀ քրեական օրենսգրքի 185 հոդվածի 2-րդ մասի 1-ին կետով:
51-ամյա Ղալեչյանը այդ եղանակով ցանկացել է ուշադրություն գրավել իր գործի նկատմամբ:
Ըստ հարազատների՝ յոթ-ութ տարի առաջ Ղալեչյանից, նրա համոզմամբ ապօրինի կերպով, վերցվել է նրա տնօրինության տակ գտնվող, որպես խանութ օգտագործվող նկուղային տարածքը Գարեգին Նժդեհի փողոցում:
Ղալեչյանը պայքարել է տարբեր ատյաններում, իր համոզմամբ՝ արդարություն չի գտել: Հուսահատության հասնելով՝ արդարության բացակայության վերաբերյալ իր բողոքը քաղաքացին հայտնել է դատախազության մուտքի դուռը հրկիզելով:
Կալանքի տակ գտնված ժամանակ Ղալեչյանը երեք անգամ հացադուլ է հայտարարել:
Դատավարության նախապատրաստման փուլում ամբաստանյալ Ղալեչյանն ու իր շահերի պաշտպանը միջնորդություն ներկայացրին արագացված ընթացակարգով գործը քննելու վերաբերյալ:
Մեղադրողը և տուժողի ներկայացուցիչը չառարկեցին, որովհետև պատճառված նյութական վնասը՝ 37 հազար 550 դրամն ամբողջությամբ հատուցվել էր Ղալեչյանի հարազատների կողմից:
Ղալեչյանի հարազատները, որ ներկա էին դատական նիստերի դահլիճում, ուրախացան, երբ ամբաստանյալը միջնորդեց արագացված կարգով գործը քննելու վերաբերյալ: Ուրախության արցունքները վկայում էին, որ ընտանիքի վրա ծանր էր անդրադարձել արդարության բացակայության դեմ Խաչատուրի բողոքը: Նրանք տառապում էին՝ Խաչատուրի հյուծված տեսքը և կալանավորի կարգավիճակը տեսնելով: Դատարանի միջանցքում Խաչատուր Ղալեչյանի տեսությանն էր սպասում նորածին թոռնիկը, ում Ղալեչյանը դեռ չէր տեսել:
Խաչատուր Ղալեչյանը ընդունեց մեղքը:
Մեղադրողը միջնորդեց Խաչատուր Ղալեչյանին մեղավոր ճանաչել, դատապարտել մեկ տարի ազատազրկման, ապա համաներման կիրառմամբ ազատել պատժից և ազատ արձակել դատական նիստերի դահլիճում:
«Շնորհակալ եմ, ասելիք չունեմ»,- որպես ճառ ու վերջին խոսք՝ ասաց զուսպ ամբաստանյալը: Միգուցե նա ավելի շատ հանուն հարազատների էր համաձայնել միջնորդություն ներկայացնել արագացված ընթացակարգով իր գործը քննելու վերաբերյալ:
Դատարանը հեռացավ խորհրդակցական սենյակ:
Դատարանի կայացրած դատական ակտն անսպասելի չէր. Խաչատուր Ղալեչյանը մեղավոր ճանաչվեց, դատապարտվեց մեկ տարի ազատազրկման, նրա նկատմամբ համաներում կիրառվեց, և Ղալեչյանն ազատվեց պատժի կրումից: Նրա խափանման միջոց կալանավորումը վերացվեց:
Խաչատուր Ղալեչյանն ազատ արձակվեց դատական նիստերի դահլիճում և ընկավ ուղիղ հարազատների գիրկը:
Լուսանկարները՝ Shamshyan.com-ի
