ԱՄՆ նախագահ Դոնալդ Թրամփը դիմել է կոնգրեսին՝ Մեքսիկայի հետ սահմանային պատի շինարարության ֆինանսավորմանը հավանություն տալու պահանջով։ Այս մասին պետության ղեկավարը հայտնել է Սպիտակ տանը լրագրողների հետ զրույցի ժամանակ։
Նրա հստակեցմամբ՝ անհրաժեշտ է, որպեսզի կոնգրեսը հավանություն տա 30 մլրդ դոլարի հատկացմանը, որից 25 միլիարդը կօգտագործվի պատի շինարարության համար։ Թրամփը հույս ունի, որ այդ կառույցի շինարարությունն այդքան թանկ չի արժենա։
«Մեզ անհրաժեշտ է 30 մլրդ դոլար, որից 25 միլիարդը կուղղվի պատի կառուցմանը, իսկ 5 միլիարդը՝ անվտանգության այլ միջոցառուներին»,-ասել է նախագահը։
Նրա խոսքով՝ Մեքսիկայի հետ սահմանի պատը, ըստ ամենայնի, կլինի մոտ 1287 կմ երկարությամբ։
Թրամփը խոստացել է, որ նոր միգրացիոն բարեփոխման մեջ, հավանաբար, կներառի նորմ, որը նախատեսում է դատվածության բացակայության դեպքում անօրինական միգրանտների երեխաներին 10-12 տարվա ընթացքում ամերիկյան քաղաքացիության տրամադրում։
