ԵՄ-ն և Թուրքիան ծրագրում են մարտին վերջին բարձր մակարդակով հանդիպում անցկացնել։ Այս մասին գրում է Welt պարբերականը՝ հղում անելով Բրյուսելի դիվանագիտական աղբյուրներին։
Պարբերականի տվյալներով՝ Բրյուսելը մտադիր է բարելավել հարաբերություններն Անկարայի հետ։ Հանդիպմանը քննարկման հիմնական թեմաներ կդառնան միջազգային ահաբեկչության դեմ պայքարը, միգրացիոն քաղաքականությունը, էներգետիկ խնդիրները և երկրների միջև ուսանողների փոխանակությունը։
Ծրագրվում է, որ Թուրքիայի նախագահ Ռեջեփ Թայիփ Էրդողանի հետ հանդիպմանը ներկա կգտնվեն Եվրահանձնաժողովի նախագահ Ժան-Կլոդ Յունկերը, Եվրախորհրդի ղեկավար Դոնալդ Տուսկը, Եվրախորհրդարանի նախագահ Անտոնիո Տայանին, ինչպես նաև Բուլղարիայի վարչապետ Բոյկո Բորիսովը՝ որպես ԵՄ խորհրդում 2018-ի առաջին կիսամյակում նախագահող պետության ներկայացուցիչ։
Հանդիպման հստակ ամսաթվեր և վայր հայտնի չէ։ Էրդողանի հետ ԵՄ առաջնորդների վերջին հանդիպումը կայացել էր անցած տարվա մայիսի վերջին՝ Բրյուսելում ՆԱՏՕ-ի գագաթնաժողովի կուլուարներում։