Ազգային ժողովի ՀՀԿ խմբակցության ղեկավար Վահրամ Բաղդասարյանը վստահեցնում է, որ Հայաստանի նախկին վարչապետ Հովիկ Աբրահամյանը Հայաստանի Հանրապետության նախագահի թեկնածուների ցանկում չկա: Ազգային ժողովում լրագրողների հետ զրույցում Վահրամ Բաղդասարյանն ընդգծեց, որ զրուցել է Հովիկ Աբրահամյանի հետ և կարող է ասել, որ նրա կողմից էլ նման ցանկություն չկա: «Իր կողմից նման ցանկություն չկա, կուսակցությունն էլ նրա անձը չի քննարկել»,- ընդգծեց Բաղդասարյանը:
Հարցին՝ կարո՞ղ են ՀՀԿ-ականների հետ Հովիկ Աբրահամյանի հաճախակի շփումները նախադրյալ հանդիսանալ, որ նա ապրիլից հետո վերադառնա իշխանության կազմ, Վահրամ Բաղդասարյանը պատասխանեց. «Եկեք նախագահի ընտրության հարցն ավարտենք, հետո դրան կանդրադառնանք»:
Ազգային ժողովի փոխնախագահ էդուարդ Շարմազանովը հունվարի 16-ին լրագրողների հետ զրույցում հայտնեց, որ ՀՀԿ-ում նախագահի թեկնածուի վերաբերյալ քննարկումները դեռ չեն սկսվել՝ չբացառելով, որ քննարկումները կմեկնարկեն հունվարի 18-ին կուսակցության գործադիր մարմնի նիստում: Միևնույն ժամանակ, նա նշել է, որ ՀՀԿ-ն նախագահի պաշտոնում առաջադրելու է ասելիք և անելիք ունեցող, լուրջ կենսագրություն ունեցող, Հայաստանում և սփյուռքում մեծ հարգանք վայելող անձի:
