«Մոսկվայում չեն տարանջատում գործող նախագահ Սերժ Սարգսյանին և վարչապետ Կարեն Կարապետյանին։ Մենք գիտենք, որ Կարեն Կարապետյանին վարչապետ է նշանակել հենց Սերժ Սարգսյանը և այն, ինչ գրում են հայաստանյան թերթերը, որ իրենց միջև տարաձայնություններ կան՝ մեզ համար պարզապես Հայաստանի ներքաղաքական դաշտի խնդիրներ են»,- «Առաջին լրատվական»-ի հետ զրույցում նման տեսակետ հայտնեց ռուսաստանցի քաղաքագետ Ստանիսլավ Տարասովը։
Մեր զրուցակիցը շարունակում է. «Ինչպես Սերժ Ազատովիչը, այնպես էլ Կարեն Կարապետյանը բավականին լավ ճանաչված և ընդունված են Մոսկվայում։ Եվ Մոսկվան կցանկանար, որ խնդիրներ չառաջանան։ Չնայած եթե տրամաբանությամբ առաջնորդվենք՝ մեզ թվում է, որ Սերժ Ազատովիչը կղեկավարի կառավարությունը, թե ով կլինի նախագահը, չեմ կարող ասել, գուցե հենց Կարեն Կարապետյանը»։
Քաղաքագետը միևնույն ժամանակ նշում է, որ այդ հարցը քննարկվելու է Հայաստանի ներսում, և Մոսկվան այս հարցում առանձնահատուկ հետաքրքրություններ չունի. «Մենք պարզապես զգում ենք, որ Սարգսյանն է լինելու վարչապետ։ Նա ղեկավարում է իշխող կուսակցությունը և շատ հավանական է, որ նա դառնա վարչապետ։ Նոր Սահմանադրությամբ՝ բոլոր կարևոր գործառույթները հենց վարչապետն է իրականացնելու և Սերժ Ազատովիչը կարող է լինել այդպիսին, շատ տրամաբանական դասավորություն է»։
Միակ խնդրահարույց հարցը, ըստ Ստանիսլավ Տարասովի, խորհրդարանական կառավարման մոդելն է՝ այն պարագայում, երբ, օրինակ, հարևան Ադրբեջանում ուժեղ նախագահական համակարգ է. «Գուցե Հայաստանն ուզում է եվրոպական մոդել որդեգրել, կարծում է, որ այդպես Եվրոպայի հետ հարաբերությունները կզարգացնի։ Հարցեր կան, բայց դրանք արմատական նշանակություն չունեն։ Կան որոշակի մանրուքներ, բայց քաղաքական կտրուկ փոփոխություններ չեն լինի»,- նկատեց մեր զրուցակիցը։
Մեր այն դիտարկմանը, որ Հայաստանում կա սոցիալական մեծ դժգոհություն, և արդյո՞ք Սարգսյանի հնարավոր վարչապետ դառնալը էլ ավելի չի զայրացնի ժողովրդին, ռուսաստանցի քաղաքագետն արձագանքեց. «Դուք կարո՞ղ եք հետխորհրդային մի երկիր ասել, որտեղ բոլորը գոհ են։ Կան տանելի և ոչ տանելի խնդիրներ։ Սերժ Ազատովիչն այսքան տարի ղեկավարել է երկիրը, բայց, օրինակ, ի տարբերություն Վրաստանի, ոչ միայն Հայաստանի տարածքային ամբողջականությունը պահպանեց, այլ նաև Ղարաբաղը։ Այո՛, Հայաստանը աշխարհաքաղաքական վատ դիրքում է, շրջափակման մեջ, բայց զարգանում է։ Ցանկալի կլիներ, որ ավելի ինտենսիվ զարգանար, բայց կա այն, ինչ կա։ Մեծ հաշվով, այն կուրսը, որ որդեգրել է Հայաստանը, բավականին դրական է և որևէ բացասական արձագանք Մոսկվայի կողմից դեպի Սերժ Սարգսյանը չկա»,- ընդգծեց Տարասովը։
Մեր զրուցակիցը հավելում է. «Գիտեք՝ մեր նախագահը, պարոն Պուտինը, նոր դեմքեր չի սիրում, վաղուց գիտի Սերժ Սարգսյանին՝ նորմալ աշխատում են իրար հետ, պարոն Կարապետյանն էլ, թեկուզ վերջերս է մտել քաղաքականություն որպես վարչապետ, բայց նրան ևս գիտեն Մոսկվայում, Դմիտրի Մեդվեդևի մտերիմն է, աշխատել է Մոսկվայում՝ «Գազպրոմ»-ում։ Այդպիսի տանդեմը միայն դրական կարող է լինել հայ-ռուսական հարաբերություններում»։
