Պետությունը պետք է ամեն ինչ անի՝ ապահովելու հետընդունման՝ ռեադմիսիայի պայմանագրով հայրենիք վերադարձած, արտասահմանում անօրինական կերպով բնակություն հաստատած անձանց և նրանց ընտանիքների բարօրությունը: Այսօր տեղի ունեցած մամուլի ասուլիսի ժամանակ այս մասին ասաց ԱԺ արտաքին հարաբերությունների հանձնաժողովի անդամ, «Մարդկային զարգացման միջազգային կենտրոն» հասարակական կազմակերպության նախկին գործադիր տնօրեն Թևան Պողոսյանը:
Նրա խոսքով՝ ռեադմիսիոն ճանապարհով հայրենիք վերադարձածների ինտեգրման խնդիրը պետությանը այնքան էլ չի մտահոգում:
«Անհրաժեշտ միջոցներն այս պահին բավարար չեն: Այնուամենայնիվ, ապագայում Հայաստանը պետք է անի հնարավոր ամեն ինչ՝ ընդունելու իր քաղաքացիներին: Որքան տեղյակ եմ, 2003 թվականից առ այսօր Հայաստան ռեադմիսիոն տարբերակով վերադարձվել է 32 մարդ՝ այն դեպքում, երբ Վրաստանում նրանց թիվը մոտ 600 է, Մոլդովայում՝ 700»,- ասաց Թևան Պողոսյանը:
Անդրադառնալով արտասահմանյան ճամբարներում ապրող մարդկանց առօրյային՝ նա նկատեց, որ տվյալ երկրում մնալու համար այլազգիները, այդ թվում՝ հայերը, պատրաստ են ամենաանհավանական պատմություններ հորինել: «Մարդիկ արտասահմանյան երկրներում կարողանում են ավելի հեշտ ապրել, քաղաքացիություն ստանալուց հետո առավել հեշտ տեղաշարժվել, դրա համար էլ պատրաստ են դիմանալու ճամբարային առօրյային»:
Անդրադառնալով երեկ Ազատության հրապարակում տեղի ունեցած իրադարձություններին՝ Թևան Պողոսյանը նշեց. «Եթե կա պայքար, լավ է: Գլխավորն այն է, որ չճահճանանք և ամեն մեկս որոշենք պայքարի մեր տարբերակը: Ամեն նման դեպք ցույց է տալիս ապագայի զարգացման ուղին: Ամեն ինչ անելով օրենքի սահմաններում՝ ես միշտ կողմնակից եմ եղել մոդեռնիզացիային և մշակութային փոփոխություններին»,- ասաց նա:
Հիշեցննեք, որ նախկին քաղբանտարկյալ, «7-ի գործով» նախկինում մեղադրվող, «Ցեղակրոն» կուսակցության նախագահ Շանթ Հարությունյանի կազմակերպած ակցիան երեկ վերածվել էր զանգվածային անկարգությունների:
Չլսելով ոստիկաններին՝ Շանթ Հարությունյանն ու իր համախոհները Ազատության հրապարակից շարժվել էին դեպի Մաշտոցի պողոտա: Ոստիկանները չէին կարողացել փակել նրանց ճանապարհը, ակտիվիստների և նրանց միջև բախումներ էին սկսվել, ինչի արդյունքում 20-ից ավելի մարդ բերման էր ենթարկվել:
Ակտիվիստները Մաշտոցի պողոտա էին բերել նաև պայթուցիկ նյութեր, որոնք պայթեցրել էին ոստիկանների ոտքերի տակ:
Դեպքի վայր էին ժամանել նաև կարմիր բերետավորները, ոստիկանական տարբեր ստորաբաժանումների ուժեր, ինչպես նաև՝ ՌՈ-ի ուժերը:
