Հայաստանի մարքսիստական կուսակցության նախագահ Դավիթ Հակոբյանը այսօր լրագրողների հետ հանդիպման ընթացքում ասաց, որ հրապարակախոս Զորի Բալայանը գողացել է իր մտքերը, քանի որ նա էր ավելի վաղ մտածել, որ Արցախը պետք է Գյուլիստանի պայմանագրով հանձնել Ռուսաստանին:
«Հայաստանը տարիներ շարունակ եղել է արյունահեղության թատերաբեմ, և հիմա Արցախի ժողովրդի համար կարևորը խաղաղությունն է: Այն հաստատելու համար Ազգային ժողովը պետք է վերահաստատի Գյուլիստանի պայմանագիրը: Ճանաչել Արցախի Հանրապետությունը որպես կոնֆլիկտոր ու գլխավոր բանակցող կողմ և անցում կատարել ռազմական դիվանագիտության ռելսերի»,- առաջարկում է նա:
Հակոբյանն առաջարկում է տեսնել Արցախը ՌԴ-ի կազմում՝ որպես ներքին սուբյեկտ՝ հանրապետութան կարգավիճակով:
«Առաջին լրատվական»-ի այն բազմաթիվ հարցերին, թե ինքն ի՞նչ է արել Արցախի անկախության համար, որ հիմա առաջարկում է այն հանձնել Ռուսաստանին, Հակոբյանն այդպես էլ որևէ կոնկրետ պատասխան չտվեց՝ փոխարենը նշեց, որ ինքը՝ որպես ՀՀ քաղաքացի, այդ լուծումն է տեսնում:
Լրագրողներից մեկը հետաքրքվեց , թե ինչո՞ւ է ինքը Հայաստանում խոսում ռուսերեն, երբ ՀՀ պետական լեզուն հայերենն է: Գլխավոր մարքսիստը պատասխանեց, որ ռուսերեն արտահայտությունները նախընտրում է ցիտել ռուսերեն․ «Ես նաև թուրքերեն գիտեմ և ցիտում եմ»։
Բանախոսը հավելեց, որ վիլնյուսյան գագաթնաժողովի ընթացքում ոչինչ չի ստորագրվելու․ «Վիլնյուսում ոչինչ չի ստորագրվելու` ինչպես մերոնք են ուզում ինչ-որ ձևով շնանալ Եվրոպային: Կա շնություն, որ տնաքանդություն չէ, կա շնություն, որ փրկություն է»:
Իսկ երբ լրագրողները երկրի գլխավոր մարքսիստին մեղադրեցին Ռուսաստանին շնանալու մեջ, նա ասաց, որ ինքը ո՛չ իշխանություններին, ո՛չ էլ Ռուսաստանին երբեք չի շնացել, պարզապես իր կարծիքն է հայտնում:
