««Ճվճվ Արոյի» որդու մասնակցությամբ վթարը համակարգի անպատժելիության հետևանքով մի փոքր դրվագ է ընդամենը։ Անպատժելի համակարգը, օրենքի առաջ ոչ բոլորի հավասար լինելը, ընտրովի արդարադատությունը պարզապես առաջին անգամ հանգեցրել են նրան, որ անպատժելիություն իրականացնողները հանդիսացան հենց զոհերը իրենց իսկ ստեղծած համակարգի»,- «Առաջին լրատվական»-ի հետ զրույցում ասաց իրավապաշտպան Արթուր Սաքունցը։
Նրա խոսքով՝ օրինակները բազմաթիվ են, երբ ակնհայտ անպատժելիությունը ծնում է նոր հանցագործություններ, իսկ այդ հանցագործությունները անպատիժ են մնում։ «Օրինակ՝ Հրազդանի քաղաքապետի որդու մասնակցությամբ վթարը, որտեղ ևս մահ կար։ Գործը կարճվեց։ ՀՀԿ-ական Կարեն Ավագյանի եղբոր մասնակցությամբ վթարը, ու նման բազմաթիվ օրինակներ կան։ «Ճվճվ Արոյի» որդու մասնակցությամբ վթարը միակը չի։ Բայց այստեղ մի շարք անպատասխան հարցեր կան, թե որտեղից «Ճվճվ Արոյի» որդուն մեքենայի մի քանի համարներ, ով է նրան այդքան պետհամարանիշներ տվել, ինչու է դրա վերաբերյալ ոստիկանությունը լռում, չի ասում, թե ինչու է նախկինում նրա մասնակցությամբ բոլոր վթարներից, պատմություններից նա անպատիժ մնացել»,- նշեց իրավապաշտպանը՝ հավելելով, որ իշխանությունը նրանց անպատիժ է թողնում, արտոնություններ է տալիս, քանի որ նույն իշխանությունը հենվում է հենց այդպիսի «բեսպրեդել անձանց վրա»։
«Դուք մի քիչ հետաքրքրվեք ու կտեսնեք, որ այդ նույն երիտասարդը ընտրությունների ժամանակ մասնակցել է նաև ընտրակեղծիքներին, քաղաքացիներին բերման է ենթարկել տեղամաս, քաղաքացիների ազատ ընտրության, կամքի վրա ճնշում է գործադրել։ Փոքր-ինչ չեմ կասկածում, որ ամեն ինչ հենց այդպես էլ եղել է։ Քաղաքական իշխանության հիմքը, քաղաքական իշխանությունը ինքը բեսպրեդել է, իրեն անպատժելի է պահում և պետք է հենվի հենց համապատասխան ռեսուրսի վրա, համապատասխան բնույթի մարդկանց վրա։ Իշխանությունն ու այդ անձինք ներդաշնակություն են։ Ուղղակի այս անգամ իրենց իսկ կողմից այդ անպատժելի գործիքները գործեցին իրենց դեմ»,- ընդգծեց Սաքունցը։
Իրավապաշտպանը ոչ մի սպասելիք չունի, որ վերջին վթարից որևէ հետևություն կարվի։ «Ես հեքիաթների չեմ հավատում։ Նման ռոմանտիկ մտքերը, թե իշխանությունը ինչ-որ եզրահանգում կանի, այլևս արտոնյալներ չեն լինի, հեքիաթ են։ Չի կարող նման բան լինել։ Մինչ այժմ չկա որևէ փաստ, որ իշխանությունը մինչ այս կատարված որևէ դեպքից հետևություն է արել։ Փոխարենը մենք ամեն անգամ հերթական օրինակով համոզվում ենք անպատժելիության առկայության մեջ։ Դուք երկու ոստիկանի մասնակցությամբ վթարից եք խոսում, բայց օրը ցերեկով 10 հոգու գնդակահարեցին, ու մինչ օրս ոչ մեկը պատասխանատվություն չկրեց։ Հիմա ինչու իրենց կողմից հովանավորվող ինչ-որ մեկը պետք է պատասխան տա։ Իշխանությունն է այդ անպատժելի վարքագիծը ձևավորել, ցույց տվել։ Իշխանությունն է սովորեցրել, որ զենք կարելի է կիրառել և սպանել մարդկանց ու մնալ անպատիժ»,- եզրափակեց իրավապաշտպանը։
««Ճվճվ Արոյի» տղերքի դեմ ժամանակին պատիժ չկիրառելը հանգեցրեց սպանության։ Ո՞վ է մեղավոր՝ իշխանությունն իր ամենաթողությամբ, առաջին հերթին՝ Վովա Գասպարյանը»,- վթարից հետո ֆեյսբուքյան իր էջում գրել է Երևանի ավագանու «Ելք» խմբակցության անդամ Արայիկ Հարությունյանը։
Հիշեցնենք, որ երեկ Երևանի Աբովյան փողոցի և Սայաթ-Նովա պողոտայի խաչմերուկում ավտովթարի հետևանքով մահացել են ՃՈ երկու ծառայող՝ Արեգ Դավթյանը և Խաչիկ Գասպարյանը։ Վթարը տեղի է ունեցել «Ճվճվ Արոյի» որդու՝ Սարգիս Վարդանյանի վարած BMW X6-ի մասնակցությամբ։ Սարգիս Վարդանյանը սկզբում դիմել է փախուստի, ապա ներկայացել է ոստիկանություն:
Վթարից հետո պարզ դարձավ, որ BMW X 6-ի մեջ հայտնաբերվել են մի քանի համարանիշներ՝ հայկական և ռուսական։
Նշենք, որ Սարգիս Վարդանյանը մշտապես հայտնվում է աղմկոտ պատմությունների, միջադեպերի, վթարների կենտրոնում։ Նա նախկինում դատապարտված է եղել։
Վթարի գործով Երևանի քննչական վարչությունում քննվող քրեական գործով Սարգիս Վարդանյանը ներգրավվել է որպես մեղադրյալ ՀՀ ՔՕ 176-րդ հոդվածի 1-ին մասով և 258-րդ հոդվածի 3-րդ մասի 1-ին կետով։
