Դենոնսացիան Ռուսաստանի վրա ազդեցության միակ լծակն է Ուկրաինայի ազգային շահերի պաշտպանության հարցում՝ հաղորդում է քաղաքական վերլուծաբան Պավել Նուսը aif.ua-ում:
Քաղաքագետը կարծում է, որ «խարկովյան համաձայնագրերի» դենոնսացիայի մասին առաջարկը մոտ ժամանակներս կներկայացվի խորհրդարանի քննարկմանը, ընդ որում՝ խմբակցություններից դուրս գտնվող պատգամավորների կողմից:
«Ուկրաինայի համար ծայրահեղ անշահավետ «խարկովյան համաձայնագրերի» դենոնսացիայի մասին առաջարկը շուտով կներկայացվի խորհրդարան: Իմ տեղեկատվության համաձայն՝ դա նախատեսվում է անել խմբակցությունից դուրս գտնվող պատգամավորների կողմից, իսկ դենոնսացիային կաջակցի խորհրդարանական մեծամասնությունը՝ բացի Ուկրաինայի Կոմունիստական կուսակցություն խմբակցությունից և խորհրդարանի առանձին անդամներից: Թե որքան շուտ կքննարկվի դենոնսացիայի հարցը՝ կախված է նրանից, թե Ռուսաստանն ինչ դիրքորոշում կշարունակի գրավել: Եթե Կրեմլը շարունակի ճնշումը և տեղեկատվական պատերազմն ընդդեմ Ուկրաինայի, դենոնսացիայի մասին հարցի քննարկումը կկայանա արդեն հաջորդ շաբաթ»,- կարծում է փորձագետը:
Նա նշել է, որ դենոնսացիան կհանգեցնի ավելի մեծ հակամարտության Ուկրաինայի և Ռուսաստանի միջև, քանի որ հենց գործողությունը նախատեսում է Ռուսաստանի Սևծովյան նավատորմի դուրսբերում Ղրիմից:
«Սակայն Ուկրաինան կստանա միջազգային հանրության, ԵՄ-ի, ԱՄՆ-ի աջակցությունը, այդ պատճառով ռուսական Սևծովյան բազան արդյունքում կլքի Ղրիմը»,- նշել է Նուսը: