Թեհրանի կենտրոնում այսօր հակաամերիկյան ցույցի ժամանակ, որին մասնակցել են տասնյակ հազարավոր մարդիկ, ամերիկյան դրոշ է այրվել: Փակ է Թեհրանի կենտրոնի այն փողոցը, որտեղ գտնվում է ԱՄՆ նախկին դեսպանատան շենքը:
Ողջ փողոցում կախված են ցուցապաստառներ՝ ԱՄՆ նախագահ Բարաք Օբամայի, ամերիկացի պատանդների, ինչպես նաև Գերմանիայի կանցլեր Անգելա Մերկելի պատկերով: Այս մասին հայտնում է RIA Novosti-ն՝ հիշեցնելով, որ Մերկելն օրերս հայտնվել էր ամերիկյան հատուկ ծառայությունների գաղտնասլման սկանդալի կենտրոնում:
ԱՄՆ նախկին դեսպանատան շենքի մոտ, որը ստացել է «լրտեսական բույն» անվանումը, մարդիկ վանկարկում են հակաամերիկյան և հակաիսրայելական կարգախոսներ: Ակցիայի մասնակիցների ձեռքում ավանդաբար ազգային դրոշներն են, նախկին և գործող այաթոլլաների պատկերները:
Ակցիային, ինչպես նախորդ տարիներին, մասնակցում են 7-16 տարեկան երեխաներ, ինչպես նաև բազմաթիվ ուսանողներ: Երեխաները բարձրացրել են պաստառաներ՝ «Մա՛հ Ամերիկային», «Մա՛հ Իսրայելին» գրություններով: Տեսանելի են նավթային ու գազային խողովակների, ինչպես նաև ցենտրիֆուգների տեսքով փուչիկներ, որոնց վրա գրված են «Պատժամիջոցների դեմ պայքարի արդյունքը 18 հազար գործող ցենտրիֆուգներն են Իրանում»:
Իրանի մայրաքաղաքում ակցիան անցկացվում է 1979 թվականի իրադարձությունների 34-րդ տարելիցի առիթով: Այաթոլլա Խոմեյնիի՝ արմատական տրամադրություններով կողմնակիցները 1979-ի նոյեմբերի 4-ին գրոհով զավթել էին Թեհրանում ԱՄՆ դեսպանատունը՝ պատանդելով 52 աշխատակցի, որոնց պահել են 444 օր: Միջադեպի հետևանքով խզվել են դիվանագիտական հարաբերությունները, որոնք մինչ օրս չեն վերականգնվել: Ակցիաներն անցկացվում են ամեն տարի՝ գրեթե նույն սցենարով: