Օրեր առաջ մի շարք սփյուռքահայ արվեստի գործիչներ, այդ թվում՝ Սերժ Թանկյանը, Ատոմ Էգոյանը, կոչ են արել պաշտպանել Հայաստանում միասեռականների իրավունքները:
Այս հարցի շուրջ այսօր ասուլիսին իրենց տեսակետները հայտնեցին քանդակագործ Ֆերդինանդ Առաքելյանը և գրականագետ Արտեմ Հարությունյանը:
Արտեմ Հարությունյանի հավաստմամբ՝ նամակի հեղինակները իրենց միլիոնանոց արժողությամբ տաքուկ սենյակներում նստած՝ խորհուրդ են տալիս, թե արվամոլությունը վատ բան չէ՝ մոռանալով, որ մեզ ուրիշ նամակներ են պետք. «Էգոյանը թող լավ ֆիլմեր նկարի, օրինակ վերցնի հրեա ռեժիսորներից, ովքեր ցեղասպանությունը պատկերելու համար քարը քարին չեն թողնում»:
Նրա հավաստմամբ՝ միասեռականներին ամենախիստ ձևով դատապարտելը ճիշտ չէ, քանի որ նրանց դատապարտելով՝ վերածում ենք գազանի: Պարզապես պետք է դպրոցներում մտցվի սեռական դաստիարակության առարկա, որպեսզի երեխաները ճիշտ սեռական դաստիարակություն ստանան և հետագայում շեղումներ չունենան:
Ասուլիսի մյուս բանախոս Ֆերդինանդ Առաքելյանն էլ հավելեց, որ այս թեմայի մասին խոսելիս հիշում է 90-ականները, երբ Հայաստանը պայքարում էր տուբերկուլյոզի դեմ, և հիվանդությունը չտարածելու համար այդ հիվանդներին մեկուսացնում էին. «Մենք չենք կարող միասեռականությունն ընդունել, դա հակաբարոյական է, ավելի սարսափելի, քան թմրամանիան»:
Նրա կարծիքով՝ նամակը միտում ունի. եթե միտում չունենար, չէին գրի: Բանախոսը նշեց, որ հնարավոր է՝ դա գրված լինի Հայաստանից ինչ-որ մեկի խնդրանքով: «Այս նամակը պահեք ձեր Եվրոպայում. Հայաստանում դրա կարիքը չկա»,- նշեց նա՝ հավելելով, որ դա աղանդների տրամաբանական շարունակությունն է և միայն մի միտում ունի՝ խարխլել պետության հիմքերը: