Մարզական լրագրողների և քաղաքացիների քվեարկության արդյունքներով երեկ ձևավորվեց 2017 թվականի Հայաստանի լավագույն մարզիկների տասնյակը: Մարզական լրագրողների քվեարկության արդյունքով առաջին հորիզոնականը զբաղեցրել էր Փարիզում աշխարհի չեմպիոնի կոչումը նվաճած ըմբիշ Արթուր Ալեքսանյանը:
Երկրորդ հորիզոնականում աշխարհի գավաթակիր, շախմատիստ Լևոն Արոնյանն էր, իսկ երրորդ հորիզոնականը հավասար միավորներով կիսել էին ֆուտբոլի Հայաստանի ազգային հավաքականի ավագ Հենրիխ Մխիթարյանը և աշխարհի չեմպիոն, ըմբիշ Մաքսիմ Մանուկյանը: Վերջինիս հաջորդում էին, համապատասխանաբար, բռնցքամարտիկ Հովհաննես Բաչկովը, ծանրորդներ Սիմոն Մարտիրոսյանն ու Գոռ Մինասյանը, սամբիստ Տիգրան Կիրակոսյանը, ըմբիշ Լևան Բերիանիձեն և հեծանվորդ Էդգար Ստեփանյանը: Հաշվի առնելով մարզիկների ձեռքբերումներն ու նվաճումները՝ լրագրողների կողմից ձևավորված լավագույն տասնյակը որոշ վերապահումներով կարելի է օբյեկտիվ համարել:
Հասարակության շրջանում անցկացված SMS քվեարկությունը, որին մասնակցել է շուրջ 20 հազար քաղաքացի, կարելի է անվանել ֆանտաստիկ:
Խոսքը չի վերաբերում հասարակության կողմից Հենրիխ Մխիթարյանի օգտին քվեարկելուն: Մխիթարյանին լավագույն մարզիկ ճանաչելը միանգամայն սպասելի էր: Ֆուտբոլն ամենասիրված և ամենամասսայական մարզաձևն է: Մխիթարյանը միակ հայ ֆուտբոլիստն է, որը մեծ նվաճումների է հասել համաշխարհային ֆուտբոլում: Մխիթարյանի շնորհիվ միլիոնավոր մարդիկ տեղեկացել են Հայաստան երկրի մասին: Մխիթարյանի՝ միայն Եվրոպա լիգայի գավաթը գլխավերևում պահելը հպարտության րոպեներ պարգևեց միլիոնավոր մարդկանց: Հասարակության քվեարկության արդյունքներով երկրորդ հորիզոնականը զբաղեցրել է մարտական սամբոյի աշխարհի չեմպիոն Գրիգոր Մխիթարյանը:
Ընթերցողներիս, կարծում եմ, չեմ հիասթափեցնի, եթե խոստովանեմ, որ լինելով 15 տարվա մարզական լրագրող՝ երբեք հոդված չեմ գրել սամբոյի, առավել ևս մարտական սամբոյի մասին: Տեղյակ չեմ, թե ով է ամենահայտնի սամբիստը: Հեռուստացույցով երբեք չեմ տեսել, որ սամբո ցուցադրվի: Նշենք, որ սամբոն համարվում է, այսպես ասած, սովետական մարզաձև, որը հիմնվել է 30-ական թվականներին ներքին գործերի՝ ժողովրդի կողմից հայտնի НКВД-ի սպաների մարտական պատրաստվածությունը բարձր պահելու համար: Որքանով որ տեղյակ եմ՝ մարտական սամբոն իր վարկանիշով զիջում է դասական սամբոյին: Եվ ահա Գրիգոր Մխիթարյանը աշխարհի չեմպիոն է դարձել այս տարվա նոյեմբերին՝ Սոչիում տեղի ունեցած մարտական սամբոյի աշխարհի առաջնությունում:
Ի դեպ, 52 քաշային կարգում, որտեղ Մխիթարյանը չեմպիոն է դարձել, հայտավորված են եղել ընդամենը 8 սամբիստներ, որոնցից 7-ը՝ նախկին Խորհրդային միության երկրներից: Կարծում եմ՝ մեկնաբանություններն ավելորդ են: Ի սրտե շնորհավորելով Գրիգոր Մխիթարյանին՝ պետք է հիշատակենք հայտնի ասույթը՝ ժողովուրդը երբեք չի սխալվում: Իմաստուն, ակտիվ հասարակությունը, որը մասնակցել է քվեարկությանը, փաստորեն սամբոյի մեծ սիրահար է, ինչը կարելի է բացահայտում համարել: Հասարակություն, որի համար համար Սամբոյի աշխարհի չեմպիոնը ավելի բարձր է, քան Օլիմպիական և աշխարհի բազմակի չեմպիոն Արթուր Ալեքսանյանը, աշխարհի գավաթակիր Լևոն Արոնյանը, աշխարհի չեմպիոն Մաքսիմ Մանուկյանը, բռնցքամարտիկ, Եվրոպայի չեմպիոն Հովհաննես Բաչկովը, հայտնի ծանրորդներ Սիմոն Մարտիրոսյանն ու էլի բազմաթիվ մարզիկներ: Եթե շարժվենք այս տրամաբանությամբ, ապա եթե լավագույն մարզիկների հավակնորդների շարքում լինեին արևելյան մարզաձևերի ներկայացուցիչները, ապա հենց նրանք 90 տոկոսով կձևավորեին լավագույն տասնյակը:
Նշենք, որ տարատեսակ կարատեների աշխարհի չեպիոններ այսօր ունենք գրեթե բոլոր «թաղերում»: Մասնակցելով 7-8 հոգանոց աշխարհի առաջնություններին՝ մեր կարատեիստները տարվա ընթացքում հարյուրավոր մեդալներ են բերում: Իսկ թե ինչու է սամբոյին հատուկ ուշադրություն դարձվում, կարծում ենք, պարզ է: Մարզաձևը սովետական է՝ ռուսական, իսկ մենք դեռևս չենք կարողանում թոթափել «Սովետից» մնացած փոշին: Ու թեև շատ է խոսվում, որ լավագույն մարզիկների ընտրությունների նոր ձևաչափը արդար է, թափանցիկ, այդուհանդերձ՝ գրանցված արդյունքները ոչ միանշանակ արձագանք են ստացել: Չցանկանալով որևէ կերպ մեկնաբանել լավագույն մարզիկի ընտրությունների նոր ձևաչափը՝ կարող ենք միայն փաստել, որ մեր երկրում քչերն են հավատում ազատ և արդար ընտրություններին:
Ավելին, ընտրությունների միջոցով 10 հազար դրամ աշխատող մարդը հոգեբանորեն ուղղակի պատրաստ չէ իր գրպանից թեկուզ 50 դրամ ծախսել և մասնակցել ընտրություններին: Ինչևէ, ունենք այն, ինչ ունենք: 2017 թվականի Հայաստանի 10 լավագույն մարզիկներին շնորհավորելով Ամանորի և Սուրբ ծնունդի կապակցությամբ՝ ցանկանում ենք նորանոր ձեռքբերումներ և նվաճումներ:
