«Թուրքիայի խորհրդարանական ընտրությունների շեմին հիմնական քաղաքական դեբատները գնում են ոչ թե արտաքին քաղաքականության ոլորտի հիմնական շեշտադրումների շուրջ, այլ ներքին խնդիրների: Սակայն արտաքին քաղաքականության բնագավառում էլ հիմնական մրցակից երեք կուսակցությունները ներկայացրել են իրենց ծրագրերը»,- այսօր, խոսելով Թուրքիայում ընթացող նախընտրական պայքարի մասին, տեղեկացրեց ԳԱԱ Արևելագիտության ինստիտուտի աշխատակից, թուրքագետ Անուշ Հովհաննիսյանը:
Նա նշեց, որ իշխող «Արդարություն և զարգացում» կուսակցության արտաքին քաղաքականությանը վերաբերող ծրագիրը բավականին հավակնոտ է: Նրանք ծրագրում են 21-րդ դարում Թուրքիան դարձնել ոչ միայն տարածաշրջանի, այլև աշխարհի առաջատար երկրներից մեկը: Համաշխարհային տնտեսության բնագավառում նպատակ ունեն զբաղեցնել 10-րդ տեղը՝ ներկայիս 16-ի փոխարեն, իսկ գյուղատնտեսության բնագավառում՝ 5-րդ:
Հովհաննիսյանը նկատեց, որ ԵՄ հետ հարաբերությունները ևս նախատեսվում է շարունակել, սակայն եթե ԵՄ-ն շարունակի մերժել Թուրքիային, ապա ինքը՝ ԵՄ-ն, 21-րդ դարի շրջանակներից դուրս կմնա: ԱՄՆ հետ ևս շարունակվելու է ռազմավարական համագործակցությունը: Ինչ վերաբերում է Հարավային Կովկասի հետ հարաբերություններին՝ Անուշ Հովհաննիսյանի գնահատմամբ, չափազանց հետաքրքիր է այն, որ այս տարածաշրջանը դիտարկվում է Ռուսաստանի հետ միասին, ինչն էլ ենթադրում է, որ այստեղ ծագած բոլոր խնդիրները Թուրքիայի առաջատար կուսակցությունը նպատակ ունի կարգավորել հենց Ռուսաստանի հետ:
Ազգայնական շարժում կուսակցության նախընտրական ծրագրի արտաքին-քաղաքական բլոկին անդրադառնալով՝ Հովհաննիսյանը նշեց, որ վերջիններս մեղադրում են Միացյալ Նահանգներին հայ-թուրքական գործընթացն սկսելու մեջ, ինչպես նաև շեշտում են, որ եթե իրենք գան իշխանության, ապա մեկ տարվա ընթացքում Լեռնային Ղարաբաղը կվերադարձվի Ադրբեջանին:
