«Սասնա ծռեր-3»-ի գործով դատական նիստի սկզբում Կարո Եղնուկյանը հանդես եկավ միջնորդությամբ: Նա ասաց, որ իր մոտ էպիզոդիկ հիպերտոնիկ հիվանդություն է, որը առաջանում է սթրեսային իրադրությունում, մասնավորապես՝ իրեն դատարան բերելու ժամանակ. «Սա լավագույն դեպքում խոշտանգում է, վատագույն դեպքում՝ սպանություն: Ինքնակամ հրաժարվում եմ դատաքննությանը մասնակցելու իրավունքից, ինձ հարկադրաբար նիստերին փոխադրելու արդյունքում իմ կյանքին և առողջությանը սպառնում է վտանգ»:
Եղնուկյանը միջնորդեց իր գործի մասը անջատել, կալանքը փոխարինել կալանքով, իրեն չտեղափոխել դատարան: Այնուհետև նա ասաց, որ վատ է զգում, խնդրեց շտապօգնություն կանչել, և դուրս եկավ դատարանի դահլիճից: Դատարանը շտապօգնություն կանչեց: Մեղադրողները առարկեցին միջնորդության դեմ, փաստաբան Մուշեղ Շուշանյանը հայտարարեց. «Դատախազության հիմնական գործառույթը մարդկանց խոշտանգելը, նրանց նկատմամբ անմարդկային վերաբերմունք դրսևորելն է»:
Կարո Եղնուկյանի շահերի պաշտպան Տիգրան Հայրապետյանը հայտարարեց, որ իր պաշտպանյալը մեկ շաբաթ աշխատել է միջնորդության վրա, դատարանում 45 րոպե խոսում էր իր հիվանդություններից, իսկ դատախազները չկարևորեցին մարդուն, ով բարձրագույն արժեք է:
Դատարանը մերժեց Կարո Եղնուկյանի միջնորդությունը, այնուհետև փաստաբան Անուշ Մխիթարյանը միջնորդեց իր պաշտպանյալ Հովհաննես Վարդանյանին անհապաղ ազատ արձակել կամ գրավ կիրառել: Միջնորդությունների քննարկման ժամանակ դատավոր Արտուշ Գաբրիելյանը Աշոտ Պետրոսյանին ասաց. «Հիմա լսիր, ինչ եմ ասում՝ չկասկածես դատարանի արդարության վրա:»: Աշոտ Պետրոսյանը պատասխանեց՝ ես ձեր արդարության վրա չեմ կասկածում, դատարանի արդարության վրա եմ կասկածում:
Դատարանը հեռացել է խորհրդակցական սենյակ:
