Մի քանի օր առաջ լրացավ Վազգեն Սարգսյանի անվան ռազմական ինստիտուտում սպանված կուրսանտ Հայկազ Բարսեղյանի գործի քննության երկու տարին։ Երկու տարի անց հայրը դեռ դատարանում պայքարում է որդու սպանության բացահայտման և մեղավորներին պատասխանատվության ենթարկելու համար։
Արկադի Բարսեղյանը «Առաջին լրատվական»-ի հետ զրույցում ասաց, որ փաստաբաններից ոմանք շատ են ձգձգում գործի քննությունը։ Անհարգելի բացակայում են, նիստերը չեն կայանում, քննությունը դոփում է տեղում։
«Բայց հիմա վկաներն են հարցաքննվում։ Չեմ էլ հասկանում, թե այդ վկաներին ինչու են բերում դատարան։ Դրանց բերում են Մովսես Ազարյանի պաշտպանի միջնորդության հիման վրա, որոնք պետք է բնութագրեն Մովսեսին։ 25 վկա Մովսեսին բնութագրել է որպես տականք, բայց վերջին երկու վկան փորձում էին նրա դեմքը փրկել։ Բայց նաև շատ կաշկանդված են վկաները»,- ասաց կուրսանտի հայրը՝ նշելով, որ վկաների կաշկանդվածությունը գալիս է նրանից, որ 4 մեղադրյալները դատարանոմ իրենց շատ լկտի են պահում, հայացքներով վկային ճնշման են ենթարկում։ Դրա վառ ապացույցը վկաներից մեկի հարցաքննությունն էր, որը ոչ մի բառ չխոսեց։ Անընդհատ կրկնում էր, որ իր նախաքննական ցուցմունքները հիմք ընդունեն։
Արկադի Բարսեղյանը ակնկալում է, որ մեղադրյալները պետք է ցմահ ազատազրկման դատապարտվեն, որպեսզի դա դաս լինի ոմանց, ովքեր նորից կփորձեն զինվորի, կուրսանտի վրա ձեռք բարձրացնել։
«Ուրախանում ես, երբ տղա երեխա ես ունենում, պահում ես, մեծացնում ես, մեկ էլ բերում են, դիակը տալիս են քեզ՝ հայտարարելով, թե ինքնասպան է եղել։ Ամենախիստ պատիժը պետք է լինի, արդարացի պատիժ։ Ցմահ ազատազրկում։ Ափսոս, որ մահապատիժ չկա։ Մենք դեռ ցմահի դեպքում էլ պետք է մեր գրպանից պահենք բանտում, կերակրենք։ Նրանց ցմահ պետք է տան, առանց ներման իրավունքի։ Նրանք պետք է իրենց կյանքի վերջին օրն էլ բանտում անցկացնեն»,- ասաց հայրը։
Առավել մանրամասն՝ տեսանյութում:
