«Եթե իշխանությունը ռեալ չցանկանա ստորագրել այդ համաձայնագիրը, իր այսպես կոչված «անկախ» փորձագետների միջոցով լուրեր կտարածի ու չի ստորագրի։ Բայց այսօր ես դրական տենդենց եմ տեսնում․ և՛ ԵՄ-ն է ուզում ստորագրել, և՛ մեր իշխանությունները։ Հուսով եմ, որ այդպիսի հնարքների չեն գնա»,- «Առաջին լրատվական»-ի հետ զրույցում նման տեսակետ հայտնեց Գլոբալիզացիայի և տարածաշրջանային համագործակցության վերլուծական կենտրոնի նախագահ, միջազգայնագետ Ստեփան Գրիգորյանը՝ ի պատասխան մեր այն հարցին, որ ըստ որոշ տեղեկությունների՝ մտավախություններ են առաջացել ԱլԳ շրջանակներում ընդունվող հռչակագրի տեքստի հետ կապված։
Ստեփան Գրիգորյանը նշում է՝ Եվրամիության կողմից որևէ խոչընդոտ չկա, եթե ստորագրությունը խափանվի՝ միայն մեր իշխանությունների պատճառով է լինելու։ Միջազգայնագետը նշում է, որ այսօր արտաքին գործերի նախարարությունն իր տեղեկություններով՝ քայլեր է անում հռչակագրի ոչ հայանպաստ ձևակերպումները շտկելու ուղղությամբ։ «Ճիշտն ասած՝ չեմ հասկանում, ինչու պետք է հռչակագրում և համաձայնագրում տարբերություններ լինեն։ Համաձայնագրի մեջ կոնֆլիկտների հետ կապված ձևակերպումները իդեալական են, եթե հռչակագրում կան խնդիրներ՝ մերոնք կարող են լուծել։ Մերոնք պետք է մինչև վերջ պայքարեն ու աշխատեն։ Ադրբեջանը նույնատիպ պայմանագիր է պատրաստվում ստորագրել ԵՄ-ի հետ, իմ տեղեկություններով՝ այն պատրաստ է, մի կես տարվա աշխատանք կա դեռ ստորագրման համար։ Այն, ինչ որ տեղ գտավ Ղարաբաղի հետ կապված այս պայմանագրում, ավտոմատ տեղ է գտնելու նաև Ադրբեջանի հետ ստորագրվելիք պայմանագրում։ Տնտեսականը՝ այո՛, կտարբերվի, բայց Ղարաբաղի հարցը նույնը կլինի։ Սա է նաև այն պատճառներից մեկը, որ անպայման համաձայնագիրը ստորագրվի»,- ասաց Գրիգորյանը։
Նրա խոսքերով՝ աշխատանքներ պետք է տարվեն մինչև գագաթնաժողովը. «Հռչակագրից վերջին պահին չենք կարող հանել, այնտեղ 28 պետության ղեկավար է լինելու, 6 ԱլԳ անդամ պետության ղեկավար, այնտեղ քվեարկություն չի լինելու։ Ես պնդում եմ՝ աշխատանք հիմա տարվում է։ Պետք է հասնել կոմպրոմիսի մինչև գագաթնաժողով։ Եթե չհասնենք նման կոմպրոմիսի, ապա կստորագրենք հռչակագիրը՝ վերապահումով։ Ասենք՝ հռչակագիրը բոլոր կետերով է աշխատում, բացառությամբ այս կետի»։
Հարցազրույցն ամբողջությամբ՝ տեսանյութում։
