Գործազրկությունը Հայաստանում նվազել է: Այս են ցույց տալիս Ազգային վիճակագարական ծառայության տվյալները: Ըստ այդ տվյալների գործազուկների թիվը և հետևաբար գործազրկության մակարդակը Հայաստանում ամսեամիս նվազում է:
Այսպես, այս տարվա երկրորդ եռամսյակում Հայաստանում գործազուրկ էր 228 հազար 100 մարդ, այն դեպքում երբ 2012թ.-ի նույն ժամանակում գործազուրկների թիվը 246 հազար 200 էր: Այսինքն, ըստ պաշտոնական տվյալների մեկ տարում մեր երկրում գործազուրկների թիվը նվազել է 18 հազար 100-ով: Ընդ որում կտրուկ նվազել են տղամարդ գործազուրկները` նույն ժամանակում 19 հազար 800-ով, իսկ կին գործազուրկները հակառակն` ավելացել են 1600-ով: Սա իհարկե մտահոգիչ է, քանի որ առանց այդ էլ գործազուրկների կեսից ավելին կանայք են:
Եթե ուսումնասիրում ենք Ազգային վիճակագրական ծառայության տվյալները, ապա նկատում ենք, որ ըստ դրանց վերջին շրջանում գործազուրկներն անընդհատ նվազում են: Նույն պատկերն էր նաև առաջին եռամսյակում: Այս տարվա առաջին եռամսյակում Հայաստանում գործազուրկ էր ավելի քան 230 հազար մարդ և 2012-ի նույն ժամանակի համեմատ այս ցուցանիշը նվազել էր միանգամից ավելի քան 55 հազարով:
Առաջին երեք ամսիներին նվազել էր և՛ գործազուրկ կանանց, և՛ տղամարդկանց թիվը, և չնայած դրան դեռ գերակշռում էին կին գործազուրկները: Այժմ այդ տարբերությունը մի փոքր ավելի է մեծացել, և վերջին տվյալով Հայաստանում գործազուրկների 56.2 տոկոսը կանայք են:
Հիշեցնենք, որ սրանք պաշտոնական տվյալներն են: Այսինքն, այստեղ որպես գործազուրկ հաշվում են այն մարդկանց, ովքեր Զբաղվածության պետական ծառայությունում պաշտոնապես գրանցված են որպես գործազուրկ: