Նոյեմբերի 5-ին կայանալիք ՏԻՄ ընտրություններին դիտորդական առաքելություն է իրականցնելու 11 տեղական դիտորդական կազմակերպություն և ոչ մի միջազգային կազմակերպություն։ Ընդ որում, երբ դիտարկում ենք դիտորդական առաքելության համար հավատարմագրված հասարակական կազմակերպությունների ցանկը, ապա միայն հանրությանը հայտնի մեկ-երկու կազմակերպություն կա։ Մնացածի անգամ անվանումները ծիծաղ են առաջացնում։ Սակայն հենց այս կազմակերպությունների դիտորդներն էլ ծածկում են ամբողջ դիտորդական դաշտը, սակայն խախտումների մասին առանձնապես բարձրաձայնումներ չեն լինում։ Նույն՝ «Հաղթանակի զավակներ» ՀԿ-ն, 100 դիտորդ հավատարմագրած «Ազատ երիտասարդական խորհուրդ» ՀԿ-ն, «Իրավական մշակույթի զարգացման ինստիտուտ» կազմակերպությունը, 48 դիտորդ հավատարմագրած «Հայք»-ը, «Իրավական մշակույթի զարգացման ինստիտուտ» ՀԿ-ն ու մյուսները մասնակցել են և նախորդ խորհրդարանական ընտրություններին, դրանից առաջ բոլոր համապետական ընտրություններին և վերջում պարզվել է, որ այդ կազմակերպությունները բացարձակ կապ չունեն դիտորդական առաքելության հետ, իսկ նրանց հավատարմագրած դիտորդները պարզապես «ֆեյք» դիտորդներ են, որոնք եղել են ՀՀԿ-ի վստահված անձ, ՀՀԿ-ի հանձնաժողովի նախագահ, ՀՀԿ անդամ։ Վերջին խորհրդարանական ընտրություններից հետո բազմաթիվ դեպքեր բացահայտվեցին, երբ տեղամասում դիտորդի վկայականով գտնվող անձը հավատարմագրված չի եղել ԿԸՀ-ում։ Նրանք պարզապես դիտորդի վկայական փակցնելով լրացրել են տեղամասում դիտորդի տեղը՝ չբարձրաձայնելով խախտումների մասին։ Իսկ Երևանի ավագանու ընտրությունների ժամանակ դեպք էր արձանագրվել, որ ՀՀԿ-ական ավագանու անդամի թեկնածուն էր ներկա եղել տեղամասում` դիտորդի վկայականով։ Երբ նրան զգուշացրել էին, առանց նեղվելու վկայականը հանել-տվել էր և գնացել տեղամասից:
«Անկախ դիտորդ» նախաձեռնության ներկայացուցիչ, «Իրազեկ քաղաքացիների միավորում» ՀԿ նախագահ Դանիել Իոաննիսյանը, որը նախորդ բոլոր ընտրություններին մշտապես մասնակցել է դիտորդական առաքելության, «Առաջին լրատվական»-ի հետ զրույցում ասաց, որ այս անգամ որոշում են կայացրել չմասնակցել, քանի որ անիմաստ են համարում մասնակցել մի գործընթացի, որը բեմադրություն է հիշեցնում և որտեղ քաղաքականություն չկա։ «Սովորաբար Հայաստանում ընտրությունները, հատկապես ՏԻՄ ընտրությունները, անցնում են այն մթնոլորտում, որը հեռու է ժողովրդավարության մեր ընկալումներից։ Մրցապայքարի հիմքում ոչ թե ծրագրերն ու գաղափարներն են, այլ թեկնածուների անձն է և նրանց շրջապատի անձինք։ Այս ընտրություններին մեր հետաքրքրության պակասը հենց այս հանգամանքով է բացատրվում։ Ընտրություններում քաղաքականություն չկա բացարձակ։ Ոչ մեկը ծրագիր չի ներկայացնում, իրական մրցակցության ականատես չենք լինում»,- ասաց Իոաննիսյանը՝ հավելելով, որ ստեղծված իրավիճակում ընտրությունների ժամանակ դիտարկելու ոչինչ չկա։ Ընդդիմությունը չի մասնակցում ՏԻՄ ընտրություններին, միայն իշխանությունն է՝ իր թեկնածուներով մրցում է, մրցակցում է ու ընտրվում։ «Ամեն ինչ կանխորոշված է։ Այստեղ ինչ դիտարկես։ Ում կողմից իրականացված խախտումը դիտարկես»,- նշեց Իոաննիսյանը։ Վերջինս նորմալ է համարում, որ ՏԻՄ ընտրություններին միջազգային կազմակերպություններ չկան, քանի որ նրանք գալիս են և մասնակցում են համապետական ընտրություններին, կամ առավելագույնը՝ Գյումրու կամ Վանաձորի ընտրություններին։ «Փոքր, գյուղական ընտրություններին միջազգային կազմակերպությունները չեն մասնակցի»,-ասաց նա։
