Մեծ Բրիտանիայի վարչապետ Թերեզա Մեյը The Telegraph-ի հետ հարցազրույցում նշել է, որ երկիրը կարող է հեռանալ ԵՄ-ի որոշ նորմերից ու կանոններից Brexit-ից հետո 2 տարվա ընթացքում։
«Կլինեն օրենսդրության որոշ ոլորտներ, որոնք չեն անդրադառնա մեր հարաբերությունների վրա…Կան այլ ոլորտներ, որոնցում, նայելով դեպի ապագա, մենք կարող ենք դնել միանման նպատակներ, սակայն մտածել դրանց հասնելու տարբեր միջոցների մասին։ Եվ կան էլի ուրիշ ոլորտներ, որտեղ մենք կարող ենք համաձայնեցնել և՛ նպատակները, և՛ դրանց հասնելու մեթոդները»,-ասել է նա։
Երկու տարին, ինչպես սպասվում է, կկազմի ԵՄ-ից Մեծ Բրիտանիայի դուրս գալուց հետո անցումային շրջանը։ Օրեր առաջ բրիտանացի վարչապետը հայտարարել էր, որ Լոնդոնը պատրաստ է վճարել ԵՄ-ից դուրս գալու համար՝ հանուն նրա հետ առևտրային համաձայնագրի կնքման։
