«Սասնա ծռերի»-ի գործը փակուղում է, և դրանից դուրս գալու համար գործից մաս են անջատում, այնինչ ակնկալվում էր, որ գործով դատավորը պիտի ինքնաբացարկ ներկայացներ: Այս մասին «Առաջին լրատվական»-ի հետ զրույցում ասաց նախկին դատավոր Պարգև Օհանյանը՝ անդրադառնալով «Սասնա ծռեր» զինված խմբի 18 ամբաստանյալների գործով դատավոր Արտուշ Գաբրիելյանի որոշմանը՝ գործը առանձին վարույթի բաժանելու մասին:
«Օրենքն ասում է, որ կարելի է, ինչ-ինչ հանգամանքներից ելնելով, գործից մաս անջատել, եթե դա չի ազդի գործի լրիվության և օբյեկտիվության վրա: Արդարադատության մասով մեր լավատեսությունը շատ քիչ է, հայտնի ֆիլմը հիշեցի՝ «Իտալացիների արկածները Ռուսաստանում», որ Միրոնովին ասում է՝ կարա էս օպերան պայթի, նա էլ մտնում է բանվորական դերի մեջ, ասում՝ կարա պայթի, կարա չպայթի: Հիմա էլ կարող է արդարադատությունը տուժել, կարող է՝ ոչ: Եթե օբյեկտիվ է կատարել անջատումը, ինչը ընթացքը ցույց կտա, արդյունք կտա»,- շեշտեց նա:
Պարգև Օհանյանի դիտարկմամբ՝ պետք է նոր հանգամանք ի հայտ եկած լիներ, որ մաս անջատվեր: «Հիմա էդ ինչ հանգամանք է, որ չի եղել, նոր ի հայտ եկավ: Լրիվության վրա չի ազդի, եթե առանձին էպիզոդներ, դրվագներ են, զուտ մեղադրանքով անջատելը ճիշտ չի լինի, լրիվությունն էլ է կասկածի տակ. ամենակարևորը օբյեկտիվությունն է՝ որպեսզի այն չազդի օբյեկտիվության վրա»,- նշեց նա:
Ըստ նախկին դատավորի՝ վկաների, տուժողների ցուցմունքների հետ կապված խնդիրներ ևս կարող են առաջանալ:
Պարգև Օհանյանը նշեց, որ պետք է հուսալ՝ գործը քաղաքական պատվերով չի կիսվում. «Ուզում եմ, լավատես լինել, մտածել, որ փակուղուց ելք գտնելու համար է այդպես որոշվել»:
Մանրամասները՝ տեսանյութում:
