Հոկտեմբերի 11-ին Երևանը կդառնա 2795 տարեկան: Տոնին ընդառաջ՝ «Առաջին լրատվական»-ն անցկացրեց հարցում մեր համաքաղաքացիների շրջանում, թե ինչպես են վերաբերվում այն փաստին, որ տոնի համար քաղաքապետարանը ծախսել է 200 մլն դրամ, որի մի մասը անհատ բարերարներն են փոխանցել:
Մեզ հետ զրույցում մեր համաքաղաքացիները նշեցին, որ արհեստականորեն ուրախություն սարքելը ճիշտ չէ, մանավանդ եթե որևէ նվաճում չկա. «Այնպես պետք է անել, որ մարդիկ սրտով ուրախ լինեն: Տոնակատարություն է, ինչ-որ կերպ պետք է նշվի, սակայն այդ գումարը շատ է»:
Մեկ այլ քաղաքացի այդ հարցին պատասխանեց, որ եթե ծախսել են, ուրեմն պետք էր:
Մեզ հանդիպեց նաև մի արգենտինահայ, ով ասաց, որ Արգենտինայում շուրջ 53 տարի է բնակվում և չի հիշում մի դեպք, երբ կառավարությունն այդքան գումարներ ծախսի տոնի վրա: Դրանք անում են խոշոր կազմակերպությունների միջոցով. «Զինվորների, որբերի համար այդ գումարը ծախսելն ավելի լավ կլիներ: Վերջերս էլ Նունե Եսայանի համերգի համար մեծ գումարներ ծախսեցին, սակայն կան մարդիկ, ովքեր պատրաստ են առանց այդ գումարի երգել, որովհետև կա ներսը. օրինակ՝ Արսեն Գրիգորյանը»:
Նրա հավաստմամբ՝ պետք է ուրախանալ, սակայն սրտով, ոչ թե մեծ գումարներ ծախսելով:
